08/05/2025

Mathkır bu parlamento d’Turkiya, u mnohnafşo qoyumo Sırrı Süreyye Önder b’zawho dilonoyo dımtayıb lu iqorayde

08/05/2025

ANKARA – Athmıl layimi a rişone wa qoyume da gabe folitiqoye frişe d’Turkiya leşan dmathkıri u tahlufo du rişono du parlamento-mhasyo Sırrı Süreyye Önder dkıtwe bebzabno qoyumo mu gabo d’DEM u hadomo bi taşdarto d’İmralı leşan a droşe du şlomo beyn Turkiya wa Kurdoye. U cufoyo d’Önder malımwole u mhayadwole a gabe frişe du athro u mawdewo bu miraz dtrele bıthre bu haqlo du dialog udi awyutho.

Bu tethkar dsim bu parlamento, u ahuno d’Önder-Ali Önder wa qoyume du gabo d’DEM’ste mıstaqbelın a buyoe da rişone uda qoyume da gabe frişe du athro dmahwelın u iqorathe l’Önder calu tacbo dhawile leşan u şlomo b’Turkiya. Bi qeloyto du parlamento, mahto i sırto d’Önder u kthowo, leşan kull ha dobıc, dkothıw mede du cuhdono. 

Beyn dani dhadiri u tethkarano kıtwo; a rişone zawgoye d’DEM, u rişono di MHP Develt Bahçeli, u rişono du parlamento-Numan Kurtulmuş, u malolo di CHP, u rişono du gabo d’Dactith-Ahmet Davutoğlu uğer. U malolo di CHP’ste mırle; Önder farsufo’we, d’yawmo lo rahıq mi klaytayde leşan i demoqratoyutho ubu kyono basimo dkıtwole, maxıfwo a droşe şahine dhowan’wo.

Bğer mamle dsimi bu yarhano, mathkır’ste aydarbo Önder qadır dımhayıd a hiyoyowotho kulle u hawile dawro bu şuşoto hem bu haqlo folitiqoyo u hamste di amnorutho u dkull naqla tolabwo şlomo bu athro u kull noşo’ste gıdobe lbole Önder xıd mathlono du şlomo, du şuşoto udi ahonutho beyn da came frişe du athro.