Mathkir u Sayfo b’Australia, Swisra, u b’Almanya

BRITHO – Athmıl dkıtwe 15 bu yarhano d’Hziron, u camaydan dıkhoye b’Sydney d’Australia camgabe dhadır u Qurobo Alohoyo dsim bi cito d’Mor Afrem, mıştawtafle’ste lu duxrono dsim bi durto di cito dkito eba i qoyumtho du Sayfo dsimowa lu cuhdono da Sohde du camaydan dınhiriwo mi mamlaxtho da Cuthmanoye. Bi durto di cito d’Mor Afrem, mahıt klile d’warde, maqıth şamce wa kohne u şamoşe dkıtwın hadire maqımlın teşmışto cali ruho da Sohde.

Wu camu camo dkıtwe hadiro bi cito d’Mor Malke’ste, mqadamle qole citonoye u masle u nişo dkıtwo bıthre du qtolğensano, du camaydan dtore mi tawdithayde umi hiyoyuthayde’we. Bu dumyano u camaydan b’Australia, mahwele dgımdawım dmathkır a Sohde du Sayfo mayiro dsımwo calu camaydan, gıdmdawım dnofıq moro lu athrayde, lu leşonayde u emhoyo ula timoyotho makthabzabnoye dxlıqlın an abohothayde. Bi mdito d’Locarno bu kanton d’Ticino d’Swisra, mtayıb athmıl hfitutho ma şutose d’MUB qum di qoyumtho du Sayfo dkıtyo bu park du Şayno.

Camu Abuna qaşişo Abrohom Bandır cama hadire kulle, kle qatınto d’şetqo, maqıth şamce u mqadım teşmışto cali ruho da Sohde u mahıt klilo d’warde qum di qoyumtho. Bebzabno sim mamle frişe calu qtolğenso; beynothaye me Kamuran Erbağan dmıjğele bu leşono İtaloyo. Bi mdito d’Baden’ste mathkıri athmıl a Sohde du Sayfo. Bu salon di cito d’Mor Yahkub da Sruğ bi mdito d’Göppingen, mtayabla i sictho di cito turgomo calu Sayfo. U turgomano dhiw me malfono Mattias Becer, hadırle mınyono celoyo dcamo u dilonoyith claymutho.

Bi mdito d’Delmenhorst b’Almanya bi cito d’Mor Yuhanun da Kfone ubi mtaybonutho di mcalyutho du hasyo Hanna Aydin udu kohno di cito Abuna qaşişo Şamcun Eker maczım u camo kule l’qatınto d’şetqo cali ruho da Sohde, bu zabno du noquşo di cito doyaqwo. Bebzabno maqım teşmışto u maqıth şamce cali ruho da Sohde du Sayfo. Ba mdinotho d’Tauber, b’Bebra, ubi cito d’Mor Yahkub dan Nsibin b’Verl d’Almanya’ste, maqım teşmışyotho ba citotho cali ruho da Sohde.

A mathlone d’ESU b’Göppingen u Bietigheim’ste hadiri u turgomano dkıtwe ğalabe mawthrono. Qum di qoyumtho du Sayfo b’Polheim, sim athmıl duxrono hreno dhadırle mathlone d’şutose frişe du camaydan, mşalo mi karxutho İsrayel Yawsef u acmaye’ste u hasyo di marcitho Mor Filiksinos Mattias Nayış. İ tahrazto di hfituthathe’ste mqadmo me Sarkis Theodoros dqrele’ste mimro la hadire. Helena Ay’ste qrele u buyono d’ESU bi cohnutho du duxronano.