Mawtbo d’Suriya Demoqratoyto sımle qroyto lu kenşo emwothoyo ulu Huyodo Caraboyo, dnıfqi mqabıl di siyase kabışto dkımmaşyola Turkiya

BETH ZALIN – U Mawtbo d’Suriya Demoqratoyto d’MSD, bu buyono dıfrısle bu yawmo şatonoyo du kboşo di mditho d’Cafrin, mawdacle di fnitho hani zabno d’hammış ışne kcayşo b’aykanoyutho mahişonitho wa came şerşoye di duktho kmidoşi m’Turkiya uma grube çatawiyayda.

U buyono d’MUB mawdacle dı Turkiya kımmaşyo i siyase du şuhlofo demoğrafoyo ba fenyotho dıkbışila bu garbiyo d’Suriya, kçıbro u camo tamo dmıçğıl bu leşono Turkoyo, udhowe u mahwo şqolo bi lira Tukoyto, ubebzabno an’ışmone da qıryawotho, da zabuqone, da wahde uda madraşyotho mşahılfi l’ışmone Turkoye.

U buyono mathkarle ste du yawmo şatonoyo du kboşo d’Cafrin, athi luhwoyo bu zabno dkito adyawma fulhone u nesyune dhowe esore bayn d’Anqara u Darımsuq, u mırle ”i qariwutho bayn d’Anqara u Darımsuq balhude gdımathro mrimonoyith calu camo d’Suriya, elo Erdoğan dkımtayıb ruhe la guboye gıdhowe qamoro, u Alasad ste gıdqomır cal dkımnase dıtowır i frişutho rabtho dkito bayne ubayn du kenşo emwothoyo”.

Camgabıdathe, MSD mzaharle u kenşo emwothoyo wu Huyodo Caraboyo mu qento di siyase kabışto dı Turkiya, u mawdacle du qento di siyasathe lo balhude cal Suriya yo, elo ktofe la n’athrawotho şbobe. MSD makadle ste dıkrofıd i siyase dkıtla nişo dfulğo falqe aw duktoho ma n’arcotho d’Suriya.

MSD bu huthomo du buyonayde, mawdacle du şroyo du kriz d’Suriya balhude kibe dhowe bu darbo du diyalog bayn da Suriye kulle, u sımle ste qroyto la gabe u tarafe kulle dfılhi laşan dmakşır u maşıqlo du diyalog athronoyo, udmitaqwe u gbino gawoyo, bnişo dmımte l’şıkıl d’awyutho dkiba dmatimo u kboşo, dqışco i marıhbonutho, ud’bınyo Suriya i hathto.