10/09/2020

Mbayın Rami Seyawiş mdabrono li qastra d’Cankawa

Mbayın mdabrono hatho li qastra d’Cankawa dkıtyo masırto bi hiğmonutho d’Arbil bu qlimo d’Kurdistan du Iraq.

 Sniğro Rami Nuri Seyawiş b’zawho ruşmoyo dhadırle qoyume u mşale d’şutose frişe, mbayın mdabrono li qastra d’Cankawa me darbe du mdabrono catiqo Jalal Habib.

 Athmıl safrayto bu zawho dımtayıb bu salon di mdabronutho di qastra d’Cankawa bi hiğmonutho d’Arbil, u sniğro Rami Nuri Seyawiş masılmo ele ruşmoyith i wolitho xıd mdabrono hatho li qastra d’Cankawa me darbe du mdabrono catiqo Jalal Habib.

Lu zawhano mıştawtafle u hiğmuno d’Arbil Fersat Sufi, u rişono du mawtbo di hiğmonutho d’Arbil Cali Raşid, qoyume mu camaydan bu parlamento du qlimo d’Kurdistan, hadome bu mawtbo di hiğmonutho d’Arbil, amşale da dairat uda şutose ruşmoye kule d’Cankawa u menyono mu camaydan u Kaldoyo-Suryoyo-Othuroyo.

U zawhano dımşarele bu mamlo dsımle u mdabrono catiqo di qastra d’Cankawa Jalal Habib, mdawamle bıthır ba mamle dsimi mu hiğmuno d’Arbil u mu rişono du mawtbo di hiğmonutho.

U mdabrono hatho di qastra d’Cankawa dkıtyo i sagiyutho da comurayda mu camaydan Rami Seyawiş bu mamlo dsımle, mqadamle a tawdiyothayde lu mdabrono catiqo Jalal Habib u la dairat u şutose kule d’Cankawa, cala fulhone dsımlın ban eşne dşaficina. Bıthır mathe, u hiğmuno d’Arbil mqadamle nişo xıd şukono lu mdabrono hatho di qastra d’Cankawa Rami Seyawiş, u tlıblele kuşore bi wolithayde i hathto.