02/04/2021

Mcayıd u cameydan me mşale u me rişone dı athrawotho mşahlıfe bi ohnutho d’1 Nison

Athmıl dkıtwe Ha Nison, a rişone d’Armenia, du Iraq udu qlimo d’Kurdistan frıswolın egrotho u mcayadwolın a bnaymothoyaythe a Kaldoye Suryoye Othuroye bu cedo d’Ha Nison.

Adyawmaste, kımdawmi a tahınyotho dımqadmi lu camaydan me farsufe u mşale frişe; beynothaye i rişonitho du Komisyon Amerikoyo di Hirutho Emwothoyto da Tawdithoyo Nadine Maenza.

İ rişonitho du Komisyon Amerikoyo di Hirutho Emwothoyto da Tawdithoyo Nadine Maenza, dhawila socurwotho li Gozarto d’Bethnahrin u dlaqyo u camaydan wa Mharbone u Mharbonyotho du camaydan, mşadarla egartho d’tahınyotho la hayle d’MFS u’d’HSNB bi cohnutho di Rişe d’Şato hathto d’Ha Nison. Maenza bi egartho dfrısla bi dafayda du Twitter mırla; La hawronaydan a Suryoye Othuroye Kaldoye, kıtullbanxu fsihutho rabtho b’Akitu u mbarxo.

U rişono gawonoyo da Haylawotho d’Suriya Demoqratoyto Mazloum Abdi, frısle egartho bi dafayde du Twitter u mcayadle u camaydan bu cedo d’Akitu u mırle; Bi cohnutho d’Ha Nison, kımqadmina a şlomaydan a lebonoye lu camo u Kaldoyo Suryoyo Othuroyo ula hawronaydan d’MFS, HSNB wu Sutoro u kıtulbina du cedano, dhowe wasile di şatathe dmamtıyo camruha şlomo, mşaynutho, hulmono u dmitakle u haşo wu d’Akitu dımamte dactith aminoyo towo la bnaymothoye d’Suriya kulle.

U gabo Demoqratoyo da Came-HDP’ste, mcayadle u camaydan u Suryoyo Othuroyo bi cohnutho di şato hathto d’Ha Nison. İ mşalonitho zawgoyto du Komisyon da came uda haymonwotho b’HDP Tülay Hatimoğulları frısla egartho u mahkela calu sukolo d’Ha Nison, calu makthabzabnayde u aydarbo u camaydan mafıt bu Sayfo dan 1915 leşan u qşocayde elo naqla hreto u camo lo trele ma cedayde a tawdithoye u marduthoye.

Hatimoğulları mırla; Kıtulbina du cedo d’Akitu, dmamte camruhe şlomo, hirutho u kinutho li noşutho kula. Kıtulbina da bnaymothoye d’Turkiya kulle, dhoyın b’şawyutho camhıdode u dhowelın zedqe şawye. Kıfulğina u cedano camu camo Suryoyo Othuroyo wu ağono dkobe leşan u şuşoto di marduthayde, du leşonayde u di hiyoyuthayde.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…