Mcayıd u yowmo da Neşe dı britho 8 Oder me HNB b’turgomo bu athro du Swed

U huyodo da neşe d’Bethnahrin u ferco du Swed mcayadle u cedo d’8 Oder bıha turgomo dımtayable bu qentrun du huyodo b’Södertelje.

Me gabo hreno u dawqo othuroyo da zedqe noşoyeste bi mdito d’Motala du Swed  mathkarle u yawmo d’8 Oder bıha turgomo dsımle.

Bu turgomo dımtayabwo athmıl dkıtwe 8 oder u yawmo da neşe falohe dıbritho bu qentrun du ferco du Swed du huyodo da neşe d’Bethnahrin mahke cali mıcne du yawmano.

U turgomano dımqadım ma mşale du ferco du Swed  Filiz Yeniay u Oya Tahan  mahke cali mıcne du yawmano dıkmicayıd bı britho bşıkılat mşahılfe, mahke calu ağuno d’kobe HNB ba haqle du athro u’b’Urifi.

Bıthır hiw darbo la şuwole u funoye u droşe mın kibe misim zıttır laşan dmitawdıc zıttır u yawmano bayn du camo Suryoyo-Othuroyo.

Me gabo hreno u dawqo othuroyo da zedqe noşoye bu turgomo dımtayabwole bi mditho d’Motala u rişono du Dawqo Cemil Diyarbekerli bu mamleyde mahkele calu yawmano u mırle u ağuno di şawyutho bayn la gabre u la neşe klozım mitaqwe.

U turgomano dı tocanwo u ışmo i cito wi athto u kohno di cito Rum ortodoks İsa Saliba mahkele u dawro wi hzayto dkıtla i cito cali athto, u be bzabno mahkele cali şawyutho dıklozım howe bayn la gawre u la neşe dkıtyo zedqo da neşe lfuth i tawdithoste.