10/03/2021

Menendez mabdele kampanya da imdat bu senato laşan tmidawde bu qtolğenso

U Senator Demoqratoyo Robert Menendez, mabdele kampanya da imdat bu senato d’Amerika, leşan dmıtlıb mu rişono Joe Biden dmawde bu qtolğenso dan Armınoye.

 U senator di marcitho d’New Jersey Menendez, meqım kmo yawme’ste huwole maqırhonutho bu senato u tlıbwole me Biden dmıctarıf bu qtolğenso dan 1915 u dmısnodo Armenia bi sbutho da yasire uda hbişoye dkıtne bide d’Azerbaijan.

U Senator Demoqratoyo di marcitho d’New Jersey Robert-Bob Menendez, dkıtyo u mşalo di Sictho da esore baroye du Senato, kmidıc xıd ha ma senatore qawye d’Amerika. Menendez, mabdele ucdo kampanya da imdat bu senato du athro leşan dmişadır egartho mşawtafto lu rişono Amerikoyo Joe Biden, dımhalıx ba dawsat di kongre leşan dmawde ruşmoyith bu qtolğenso dsımwola i mamlaxtho da Cuthmanoye  calan Armınoye.

Bi egarthathe kmıtlıb’ste dıklozım u qtolğenso dan 1915 dsim calan Armınoye, dmitathkır 24 bu yarho d’Nison dıbqamuthayna udu yawmano dmitathkır kull şato. Menendez mırle; Bu zabno d’dacbar, mawdewolox bu qtolğenso dan Armınoye u hatta bi kampanya da 2020’ste bu zabno du duxrono şatonoyo-mathkarwolox u qtolğensano.

U senator mırle’ste; Calathe kıtulbina menox-bşıkıl qriho u ftiho dmawdıyo i mdabronuthaydox bu qtolğensano. Klozım dtawrito u şetqo dcali şrorutho du qtolğenso dsim calan Armınoye. Man 1915 uholan 1923, i mamlaxtho Cuthmanoyto bşıkıl sistematik mnasela dquşo u camo Armınoyo u qtiwola hol 1.5 falge u jbırwola ba mo alfayo dhrene li golutho.

Bu huthomo Menendez mırle; Kmıştawtıfina caman Armınoye d’Amerika u gawonoyo dbritho, bu tethkar da dıbhani u kıbcina du qtolğensano dmitaqbıl ban athrawotho d’britho kulle. Hatuse mawdacwolxun di siyase udu diplomasi d’Amerika zrice’ne camu iqoro dla zedqe Emwothoye ba timoyotho du athraydan. A timoyothani kıtulbi menayna dmawdena bi şrorutho u dsaymina u mede dkothe menayna, leşan naqla hreto dlo mikarıri a qtolğensano wa hawbe hrene dkowın mqabıl di noşutho.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…