MFS mawdacle dkıtyo b’fusqono kamilo dımdawım dhowe hesno qawyo mqabıl d’Turkiya

U Mawtbo Folhoyo Suryoyo-MFS, mawdacle dkıtyo b’fusqono kamilo dımdawım dhowe hesno qawyo mqabıl di tahrazto bceldboboyto d’Turkiya bu athro d’Suriya.

U malolo d’MFS Matay Hanna bi maqırhonutho dhule lu tbocofroso, m’akadle da Mharbone, kobın u funoyo dıkşowe la hçome dıksaymo Turkiya wa marhıbonayda cala qıryawotho du camaydan du Xabur. 

U malolo du Mawtbo Folhoyo Suryoyo Matay Hanna, bi maqıblonutho dsimo acme mi dafo da Haylawotho d’Suriya Demoqratoyto, mawdacle du gayso kaboşo d’Turkiya uda marhıbonayde kımdawmi a hçomathe cala mdinoye dkıtne ba qıryawotho hedor di mdito d’Tel Tamır udi fnitho d’Zarkan.

Hanna bi maqırhonuthayde mırle’ste;U Mawtbo Folhoyo Suryoyo camu Mawtbo Folhoyo d’Tel Tamır ubu taro du teklif ruşmoyo mi mdabronutho gawonoyto d’QASAD, kımdawmi dobın funoyo la hçome dıksaymo Turkiya, bu taro du zedqo ruşmoyo dkıtlan dımdafcina u cafraydan. Bu zyudo da hçome Turkoye kmisomi cala qıryawotho da mdinoye, cala qentrune du yulfono ucala xtute du kahrobo, u cıl mathe’ste a maye heş qtice’ne.

Calu nişo da hçomani, u malolo d’MFS mawdacle d’Turkiya kıbco dxulqo şğuşyo ulo thnihutho bu garbay madınho d’Suriya, bnişo dmahırwo i tarmitho demoqratoyto dkıbco i Mdabronutho yothoyto dmaftola la haye ba dukotho kulle d’Suriya.

Matay Hanna bu huthomo di maqırhonuthayde, mawdacle d’MFS hadiroyo dobe funoyo lkull hçomo dıkmisım mu gayso kaboşo d’Turkiya uma marhıbonayde, u bebzabno makadle d’MFS kıtle haylo wu sebyono makfiyono leşan dhowe hesno qawyo mqabıl di tahrazto d’Turkiya dıkxulqo ucdo tukose marıhbone hathe, bıthır mıd qşic Dacış bu ağuno dhulın a Haylawotho d’Suriya Demoqratoyto.