Mid tedbire mu cameydan mqabıl du virus Corona
U qaymaqam di mditho Suryoyto Bağdede bi daşto Ninwe Cisam Behnam Matte mawdacle a tedbire dmıdlın mqabıl du kewo du virus d’Corona.
Matte bu video dıfrısle lu tbocofroso, mahkele cala tedbire dmıdlın u tlıble mu camoste dımaxır ucdo a hfitwotho camonoye dıkımtayıb.
Bıthır mıd magle du kewo d’Corona mati lu Iraq, u qaymaqam d’Bağdede bi daşto d’Ninve Cisam Behnam Matte hawile ytawyotho cama sicotho u mdabronutho di mditho u mbayanlın a tedbire mqabıl du kewano d’Corona.
U qaymaqam mahkele cala tedbirani dmıdlın bu video dfrısle lu tbocofroso dkıtne hın menaye;
Mahıtte darmono du tendifo da idotho ba dukotho dıklotım u camo, u be bzabno huwlın mawduconutho la sicotho kulle di mdabronutho d’Bağdede, la haylawotho di mşaynutho ula faolhe di mditho kulle. Bi mawdconuthathe mahkele cali ytawto dsimo cami bethkrihe u mhadarlın a cawode dmaydi yulfono, aydarbo gıdmıstaqbıli a kayiwe du zabnano.
U qaymaqam bi mawduconuthayde mırle; Bu zabnano marxaslan u timo da darmone di sniqutho leşan u camo dımhafıd ruhe mqabıl du kewo-xıd mathlo a maye du tendifo da idotho wa fase dıkmkasın u femo wu nhiro. Bu huthomoste u qaymaqam tlıble mu camo dmakle altome wa munsabat camoye xıd-hage u ğer lu zabno dactith.