14/03/2021

Mısır rfıdla i maqırhonutho d’Turkiya dkıbco dseymo esore cam Qahira

Mısır rfıdla i maqırhonutho d’Turkiya dımdacela, mabdın naqla hreto a esore diplomatiqoye beyn di şultonutho d’Qahira u d’Ankara.

U mşalo Mısroyo mırle; A esore ihidoye dkito cam Turkiya ucdo bu darbo di mathlonutho’yo u layt ğer esore acma. Kibe dhowe esore cam Ankara inaqla dmatico la qonune Emwothoye.

Mşalo mi wazirutho di baroyutho d’Mısır mfanele i maqırhonutho dhuwole u waziro di baroyutho d’Turkiya Mevlut Çavuşoğlu dımdacewole, dmarkwe esore diplomatiqoye hathe cam Qahira wan athrawotho Caraboye.

U waziro Turkoyo mawdacwole dmabdelın a esore b’darğo celoyo cam Mısır awıl naqla bıthır mi m’watyutho dhawyo’wa beynothaye ba 2013 bıthır mıd madrewo u rişqutno catiqo d’Mısır Mohammad Mursi, bu inqilab folhoyo dsımwole u rişqutno d’ucdo Abdul Fattah al Sisi acle.

Elo u mşalo Mısroyo dlo mawdıc ışme bu tbocofroso rfıdle u mamlo d’Çavuşoğlu u mırle; Layt mede hawxa bi holo-lo mabdelan esore diplomatiqoye camhıdode. Kito belhude esore d’mathlonutho beyn Mısır u Turkiya u leşan dmıftakrina dmarkıwina esore towe cam Turkiya klozım dmıdroşi a fulhone qonunoye u diplomatiqoye beynothayna, calu asas du iqoro da prensibe di morutho uda şartat di mşaynutho dan athrawotho Caraboye.

U mşalo Mısroyo mırle’ste; Mısır kınutro me kull athro dkobıc dmarkıw esore kyonoye acma, klozım bi qamayto dmatici la qonune Emwothoye ula prensibe di hawrutho dbeyn dan athrawotho şbobe u dlowe mudaxalat ba sebwotho gawoye dan athrawotho du qlimo.

Kitoste gado rabo, en Mısır dubco dımcadlo a esorayda cam Turkiya, gıdmahto şart qum Ankara-dmarhıqo ruha mu gabo dan Ahunone Maşılmone-dıkmifaşıq me Mısır xıd gabo marhıbono. Camathe’ste Mısır kırufdo i mudaxala d’Turkiya lu qrobo d’Libya ula qetre d’xlıqla bu madınho du yamo Mescoyo.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…