Mor Awa III Rowel masrahle kohno hatho li cito d’Yuldath Aloho bi mditho d’Mosko

MOSKO – Yawme d’Huşabo dşaficina ubu syomido di qadişutho du fatıryarxo Mor Awa Tlithoyo Rowel, u şamoşo ewengeloyo Yaqo Artur Avdişev masrıh kohno hatho mcadrono li cito d’Madınho d’Othuroye d’Yudlath Aloho dkıtyo bi erişkoyto d’Rusya bı Mosko. 

I masırhonutho du kohno hatho athyo luhwoyo bi methcadronutho du hasyo di marcitho d’Suriya Mor Afram Athniyel, u efesqufo du İran, d’Armenya ud’Goergia Mor Nersay Bınyamen wu kohno di cito d’Yuldath Aloho d’Mosko xuroyo Samano Odişo dkıtyo bebzabno u efetrufo fatıryarxoyo di marcitho d’Rusya. 

Lu zawho di masırhonutho mıştawtafle efesqufo Klimant xıd mathlono di fatıryarxutho d’Mosko, qaşişo Hiromonk Stefan mi dayira da n’esore baroye citonoye di fatıryarxutho d’Mosko, u rişızgado zabnoyo du Ciraq bı Mosko Xalil Cabdılrida, u mathlono zabnoyo di şultonutho du qlimo d’Kurdistan b’Rusya Danar Abu Bakır, u mathlono di rişızgadutho d’Fleşt bı Mosko u kunoşo rabo ma n’abne di marcitho Othuroyto. 

U kohno hatho qaşişo Yaqo Avdişev mawlıd bi şato da na‘1991 bi mditho d’Gırdbani bu athro d’Goergia. Mzawğoyo w’ucdo kımdawım u yulfonayde bu haqlo di thiyoloğiya bi bethsawbo d’Mosko bnişo dqathle sohdutho b’darğo di doktora. Qaşişo Yaqo Avdişev gıdhowe ucdo kohno mcadrono li cito d’Yuldath Aloho bı Mosko.