Mor Bşara Bıtrıs Alraci, mawdacle di caşinutho latyo bu teqitho du qrobo, elo bu snoco du şlomo’yo

U fatıryarxo di cito Suryoyto Marunoyto, bi koruzuthayde bu Qurobo Alohoyo dsim, grışle u zuhoro cali socurutho dsımwole camu fatıryarxo di cito Suryoyto Qatholiqoyto Mor İğnatiyos Yusuf III Yunan li mdito d’Sur bu taymno d’Lebnon. Bi socuruthathe, laqiwo i qadişuthayde rişone ruhonoye wu rişono gawonoyo da hayle Emwothoye d’Unifel wu fatıryarxo Alraci mahwewole i awyuthayde cama comure du qlimo.

Cali socuruthathe, Mor Bşara Bıtrıs Alraci mırle; Cıl mu haşo dıkcayşi bi netiçe da hçome d’İsroyel cala qastra du taymno d’Lebnon, ucıl mi zuctho dkıtte a comure cali ctiduthathe, elo naqla hreto cayşina i fsihutho di iqartho Lebnonoyto dkıtyo hdo iqartho mgawanto. Mırlan la comure du taymno di awyuthaydan acmayx masırtoyo cama sniqwothathxu kulle. Ubi zacqa qamayto dmazcaqlan acmaye mırlan: ahna lo kubcina qrobo dıksohıf a botaydan, dıkqotıl a nacimaydan u dıktore dımgalwina.

U fatıryarxo di cito Suryoyto Marunoyto grışle’ste u zuhoro cali aykanoyutho du parlamento d’Lebnon dıkdoyış u mluwo da 49 du nomuso esonoyo du athro, u dlıkmnaqe rişqutno hatho l’Lebnon, ubu şıkılano kımdawım u tedriyo da şutose ruşmoye, bu tekliyo da fulhone da mdabrınwotho gawonoye, bu froso du bulbolo b’gawe du athro, bi faqirutho du camayde ubu teqşiyo du kriz momunoyo u kenşoyo d’Lebnon.

Bu huthomo fatıryarxo Alraci mırle; İ atlilutho awkith i caşinutho latyo bu teqitho du qrobo b’zayne qaşye dlo hawno udlo lebo, elo bu snoco du şlomo’yo. U qrobo ksohıf u kqotıl bu haylo du farzılo udi nuro, elo u şlomo kmıbne bi hubo du lebo ubu nuhro du hawno. U qrobo kımvayıc kmoyutho ğalabe rabtho d’zuze, elo u şlomo kmawkıl ba mılyune d’kafine. U mabuco du qrobo u şubhoro da hakome wa yuthronathe a catume yo, elo u mabuco du şlomo u lebo d’Aloho’yo.