Mor İğnatiyos Afrem sımle qroyto lanabne di marcithayde d’Suriya, dfayşi ba botaththe u meydi atedbire dıklozım

İ qadişutho du fatıryarxo di cito Suryoyto Ortodoksoyto Mor İğnatiyos Afrem II. sımle qroyto lanabne di marcithayde d’Suriya, dfayşi ba botaththe u dlızzın l’dukotho dkibın kunoşe rabe, xıd tedbir mqabıl du virus d’Corona.

 Mor Afrem II dmawdacle dıklozım dmitafiti a fusqone lahaye, m’akadleste dlıklozım dmıxlıq zuctho rabtho dlatla mıcne la bnaynoşo.

 İ fatıryarxutho d’Antiyuxiya u dkule Madınho, bıthır ma tedbire u fusqone dımbayniwola mqabıl du kewo d’Corona, ucdo i qadişutho du fatıryarxo Mor İğnatiyos Afrem II frısle maqırhonutho lu tbocofroso cali sbuthathe.

Mor Afrem II mırle a bnaynoşo kımqaysi u kewo d’Corona cam kewe hrene pandemi awkith gunhe rabe da kewe dhawın bu dacbar di noşutho, ube bzabno kımqaysileste camu kewo du grib di şawbe, u kımmi kito ba mo alfayo dıkmaythi kull şato mi celtho di şawbe. U medano şroroyo, elo u qento du virus d’Corona bu surhobaydeyo, ucal dlıkmahwe u kewo hol bıthır kımo yawme, u mawxa u farsufo dıktocın u virusano klozamle 2, 3, 4 u hatta tıre şabe leşan dnofıq u kewo li holo. Mawxa ğalabe ulsoyoyo dmarhıqina ma kunoşe rabe u dlobina şlomo lıhdode bu darbo di ido, elo dımnasena hol dkothe menayna dfayşina ba botaydan, bnişo dnufqina moro lu hulmonaydan, lu hulmono du bayto wi mıcne du medano u hulmono du camo d’Suriya kuleyo. U ha dlatle şuğlo trılonofıq mu bayto, wu ha dkıtyo i madraştayde yaste i bethsawbayde sxırto tırfoyış bu bayto. Layto sniqutho dhowelan zuctho rabtho. İ sbutho şroro, jıddi u maziconitho’yo, elo i zuctho rabtho dlatla fuşoqo kmamtiyo acma husrono, awkith lıklozım dmıkfoxina la şuqone u dşıqlina muklone u medone dmaltıminalın b’gawe du bayto. U medano kımazıd u husrono u lıkmanqasle.