Mor İğnatiyos Yusıf Tlithoyo Yunan hawile ytawto bu Vatikan

İ qadişutho du fatıryarxo di cito Suryoyto Qatholiqoyto Mor İğnatiyos Yusıf Tlithoyo Yunan, hawile ytawto bu Vatikan cami qadişutho du papa Mor Fransis Qadmoyo.

Bi ytawtathe dıdrişi eba a’hıdriyat di Sunados mqadaşto di cito d’Roma, grişıste u zuhoro cali aykanoyutho du camaydan du madınho dilonoyith dıkhoye bu athro d’Lebnon.

İ qadişutho du papa du Vatikan Mor Fransis Qadmoyo, mıstaqbele lumıhreno bu qentrunayde bu Vatikan, i qadişutho du fatıryarxo di cito Suryoyto Qatholiqoyto Mor İğnatiyos Yusıf Tlithoyo Yunan wa hadome du mawtbo mşawrono dıksoyım a’hıdriyat di Sunados mqadaşto d’Roma dgıdlaymo bu yarho dı Tışrın u Qadmoyo bi şato da 2023.

Fatıryarxo Yunan hadomoyo bu mawtbo mşawrono di Sunados xıd mathlono da citotho madınhoye, wu mawtbo kmişakıl m’15 farsufe dkımmathli a’citotho Qatholiqoye kulle ba qıtcat mşahılfe dıbritho.

Bi ytawtathe, u papa drışle u maşıqlo da hıdriyat du knuşyo gawonoyo da n’16 di Sunados da hsayo d’Roma, wa hadire hulın a’renye wa hzayotho dkıtlın bi sbutho da hıdriyat di Sunados.

Camgabıdathe, Mor Fransis u fatıryarxo Yunan drışlın i şkihutho Mşihoyto bu qlimo du madınho mescoyo bu taro da krize folitiqoye ducdo dıkşofıc ebaye u qlimo, ukalın dilonoyith cali aykanoyutho d’Lebnon wa krize dıkcaşlın u athro bu haqlo folitiqoyo, momunoyo u kenşoyo. Bebzabno, a’tre rişone ruhonoye mşalatlın bahro cali aykanoyutho d’Suriya udu Iraq wa casqıwotho dıkloqelın u camaydan ba tre athrawothani.