Mor İğnatiyos Yusuf III Yunan mahwele hfuxyo cala taxtuşe dhawın b’Beyrut

I qadişutho du fatıryarxo di cito Suryoyto Qatholiqoyto Mor İğnatiyos Yusuf III Yunan, bu hfuxyo dmahwele cala taxtuşe dhawın athmıl b’Beyrut, sımle qroyto la mşale Lebnonoye kulle dmarmışi u wujdanathe, u dmahti u yuthrono du athro bi qamayto da yuthronathe a farsufoye.

Mxasra hreto, i sagiyutho da gabe Mşihoye d’Lebnon makadlın du camo hiro kule du athro, gıdnofıq mqabıl du zayno lo ruşmoyo d’Hizballa dkıtyo i celtho rişoyto du kriz dıkcayşo Lebnon.

U fatıryarxo di cito Suryoyto Qatholiqoyto Mor İğnatiyos Yusuf III Yunan, dkıtyo ucdo b’Hollanda, sımle qroyto la mşale d’Lebnon kulle dmarmışi u wujdanathe wu reğşathe u athronoyo u dhayri la yuthrono du athro u mırle; A bnaymothoye d’Lebnon kmakfelın u kriz momunoyo di ciyeşe yawmonoyto dmawbele u athro lu shofo. Wu ucdo’ste nafıq u kriz di mşaynutho dıkmhadıd a haye da bnaynoşo dkobın ağuno leşan dfayşi bu athro cıl ma şartat casqe dkito.

Bebzabno, i qadişuthayde maqımle teşmışto leşan dmitarku u şlomo b’Lebnon, u dmitadcıro i şalyutho bıthır ma gedşe mahişone dhawın athmıl dmazıce a comure d’Beyrut, beynothaye i fnitho dkıtyo hedor du qentrun fatıryarxoyo wi cito d’Yuldath Aloho da Suryoye Qatholiqoye. Mxasra hreto, a gabe Mşihoye; acmaye u gabo du Huyodo Suryoyo Tibeloyo, u gabo da Haylawotho Lebnonoye, u gabo da Katayeb wu gabo dan Athronoye Hire, b’qaşyutho krıhlın u qedomo cjiqo d’Hizballa udı Amal dıkmıstacımi u zaynathe mqabıl du camo u d’Lebnon, bnişo dmafiti la haye i tarmitho dkıtle u İran bu Madınho Mescoyo.

A gabe Mşihoye bi maqırhonutho dfrıslın bıthır mu knuşyathe adyawma, makadlın du camo Lebnonoyo hiro kule gıdnofıq mqabıl du zayno lo ruşmoyo d’Hizballa dkobıc dforıs i moruthayde u dkobış Lebnon. A gabe du camaydan makadlı’ste dmıdlın tedbire casye di mşaynutho, bnişo dlo mınqoli a taxtuşe la fenyotho da Mşihoye. Bebzabno, a gabe Mşihoye kalın cali usloyutho di şaryutho du bethdino bi dacwa du furqoco du lmino d’Beyrut, u makadlın’ste cali ulsoyutho di hdoyuthathe u dmahti ido bido bu maşıqlo casqano, bnişo d’zoyıd u hboso cal Hizballa, udobe u kenşo Emwothoyo funoyo la talabe da bnaymothoye d’Lebnon.

Me gabo hreno, Hizballa kımdawım dnofıq mqabıl di şultonutho du bethdino şaryo d’Lebnon, wu adyawma naqla hreto makadle dlıgmanhıt katfo hul dlo mıstacfe u dayono Tareq Bitar mi wolithayde. Wu rişqutno Mişel Caun bu hfuxyo dmahwele, hule şudoyo dgımimıd hşowo ma hayobe dıktucni i mşalutho da taxtuşe dhawın athmıl. Camgabıdathe, u gayso d’Lebnon mawdacle dımsıkle 9 farsufe dıkmisım ucdo buqore acmaye, bi sbutho da taxtuşe dhawın. Wa şutose di şultonutho cama madraşyotho d’Lebnon sxiri adyawma lfuth u haşo gawonoyo dımbayanla i şultonutho bıthır mıd qtil 7 farsufe ba taxtuşe d’athmıl b’Beyrut.