Mor Luwis Qadmoyo Sako yatu camu rişono du qlimo d’Kurdistan Neçirvan Barazani
İ qadişutho du fatıryarxo di cito Kaldoyto d’Bobıl Mor Luwis Rofayel Qadmoyo Sako, yatu camu rişono du qlimo d’Kurdistan du Iraq Neçirvan Barazani ucamu rişwazire du qlimo Masrur Barazani.
Mbayn da sebwotho rişoye dıdrişi ba tarte ytawyothani, i aykanoyutho du camaydan wa şartat du dcorayde li daşto d’Ninwe ula dukotho hrene dımgalwele menaye.
U rişono du qlimo d’Kurdistan du Iraq Neçirvan Barazani, mıstaqbele athmıl bu qentrunayde bi mditho d’Arbil, fatıryarxo Mor Luwis Sako cam taşdarto ma hsayo mcadrone di qadişuthayde. Bi ytawtathe, drişo i aykanoyutho da n’abne di cito Kaldoyto d’Bobıl udu camaydan gawonoyith bu Iraq ubu qlimo d’Kurdistan. A’tre gabe mşalatlın ste bahro cali aykanoyutho di daşto d’Ninwe udu camaydan dıkhoye bı Mawsal.
Fatıryarxo Sako u Barazani bi hzayto dhawilın, matın l’awyutho dıklozım dmitahwe tuxlono u garanti lu camaydan, laşan dqodır m’hatho dıdocır la fenyothayde, udmişare bu maşıqlo du bnoyo u hethotho di daşto d’Ninwe dıhzela husrono rabo ba hçome marıhbone du tukoso dı Dacış, udkıtyo ucdo sniqoyto li mcadronutho emwothoyto.
Camgabıdathe, Mor Luwis Sako u Barazani mwasaflın i socurutho dsımwole i qadişutho du papa Mor Fransis Qadmoyo lu Iraq ulu qlimo d’Kurdistan, u mawdaclın dkıtwa socurutho ulsoyto, udmıştacela dawro bu tecmiqo di mardutho di ciyeşe mşawtafto bayn da came Iraqoye.
Meqım mathe ste, u rişwazire d’Arbil Masrur Barazani mıstaqbewole fatıryarxo Sako wi taşdartayde. Bi ytawtathe, Barazani kaliwo cali ulsoyutho du teqwiyo di mardutho di ciyeş udi awyutho bayn da came mşahılfe du qlimo d’Kurdistan du Iraq. Bebzabno, Barazani sımwole qroyto lu camaydan dıkhoye bi golutho dıdocır lu athrayde, u makadwole ste di şultonutho d’Arbil gıdsaymo u mede dıknofıl acla, laşan u dcoro du camaydan dhowe fşito, udmisım u sutoro da zedqayde bu qlimo d’Kurdistan.