Mor Luwis Rofayel Qadmoyo Sako sımle sturyo i şultonutho Iraqayto

Cıl ma wacde dhuwola i şultonutho d’Boğdod, elo hul ucdo lımanhıt la haye ulo fuqdono ma fuqdone dımbayniwole i qadişutho du papa Mor Fransis Qadmoyo bi socurutho dsımwole lu athro du Iraq bu şuroyo du yarho d’Odır dşaficina.

U medano makadle i qadişutho du fatıryarxo di cito Kaldoyto d’Bobıl Mor Luwis Rofayel Qadmoyo Sako dkıtyo ha ma sanode rişoye di tahrazto dkımmaşyola i şultonutho du Iraq.

Bıthır mıdşafıc hedor dı tlotho yarhe cali socurutho makthabzabnoyto dsımwole i qadişutho du papa lu Iraq udlaqiwo eba a’mşale rabe di şultonutho wu camaydan di daşto d’Ninwe, ucdo i qadişutho du fatıryarxo di cito Kaldoyto d’Bobıl Mor Luwis Rofayel Qadmoyo Sako dkıtyo sanodo li tahrazto du rişwazire Mustafa Alkadhimi, bi maqırhonutho dhule li sferyawmo d’Alcarabi Aljadid sımle sturyo i şultonutho du Iraq cal dlımhalıq hul ucdo ulo dawse bi sbutho du şroyo da qetre dıkmicoşi ba fenyotho du camaydan du Iraq.

Fatıryarxo Sako bi maqırhonuthayde mırle “hul ucdo lawi ulo şuşoto bi sbutho da fuqdone dımbayniwole u papa Mor Fransis bi socuruthayde lu Iraq. Hul ucdo lımhalıq dawse bi sbutho du dcoro da Mşihoye la fenyothaththe, yaste bi sbutho du tedciro da bote u mulkonaththe dıkbişi mhın grube dıkmısnodi m’hayle gawoye rabe. Bebzabno lımhalıq ste hul ucdo ulo dawse bi sbutho du tewfiqo da grube mzayne ma fenyotho da Mşihoye ub’sebwotho hrene xdu bnoyo da citotho wu nfoqo du moro lu turist tawdithoyo da Mşihoye du Iraq”.

Camgabıdathe, Mor Luwis Sako dmawdacle du medano laşan dhowe sniqoyoyo l’sebyono folitiqoyo Iraqoyo, mahkele ste bi maqırhonuthayde cali qale ucali fliğutho dkito bayn da gabe u rişone Iraqoye calu mal u cali şultonutho.