Mor Nejib Musa Mixayel mdagele a tebe dkımdacın d’150 farsufe mu camaydan mgalwelın ba casro yawme haroyani larwal du Iraq

U rişono di marcitho d’Mawsal di cito Kaldoyto d’Bobıl hasyo Mor Nejib Musa Mixayel, mdagele a’tebe dkımdacın d’150 farsufe mu camaydan mgalwelın ba casro yawme haroyani larwal du Iraq.

Hasyo Nejib Mixayel bi maqırhonutho dhule lu tboco froso, mawdacle di socurutho du papa maklela i golutho da Mşihoye mu Iraq.

Ba casro yawme dşaficina mbarbız tebe bu athro du Iraq dkımdacın d’150 farsufe mu camaydan mgalwelın mi qastra dı Telkepe u hedora larwal du athro.

Cali sbuthathe, u rişono di marcitho d’Mawsal di cito Kaldoyto d’Bobıl hasyo Mor Nejib Musa Mixayel, bi maqırhonutho dhule lu tboco froso mdagele a’tebani dıfrisi u mawdacle du medano latyo şariro u mırle “bu zabno da kboşe du tukoso marıhbono dı Dacış, kıtwo ba olufe d’Mşihoye dıktoranwo u athro u kımgalwanwo larwal du Iraq, elo bıthır mu tyomo du qrobo cal Dacış wi socurutho dsımle u papa Mor Fransis lu Iraq, i golutho da Mşihoye kulonoyith kalyo”. Bebzabno, hasyo Nejib Mixayel maglele di aykanoyutho da Mşihoye hul darğo mşawşıto bıthır mi socurutho dsımle i qadişutho du papa lu Iraq, u mawdacle ste di aykanoyuthaththe hawyo idıcto lıbritho kula dkımqadmo fayış lu Iraq b’hzayto hathto.

U hasyo di cito Kaldoyto mawdacle ste dhın ma siyasat dımmaşın bu Iraq hawın celtho la rdufye ula dyoşe dsimi cala came qalile, ubu bahro dımşalatle cali hzayto dkıtla i şultonutho d’Boğdod li aykanoyutho da Mşihoye mırle “rğışlan dkito sicotho dımşarelın dfılhi b’şıkıl çıddi dilonoyith bi xasra yaminoyto d’Mawsal. Bıthır mi socurutho du papa mşahılfo i aykanoyutho wi şultonutho du Iraq mşarela dımqadmo b’şıkıl msimono li sbutho du bnoyo u hethotho d’Mawsal udi daşto d’Ninwe, u ftıhlaste a’tarce b’qamuthıd da tukose emwothoye laşan dsındi udımsarıhbi u zawco du bnoyo u hethotho d’Ninwe”.