26/11/2023

MOR YUSUF YOUNAN HADIR KNUŞYO QATHOLİQOYE

U mqımdino di hasyutho di cito Suryoyto Qatholiqoyto b’Holob, sım baytoyutho lu knuşyo du Mawtbo da rişone da citotho Qatholiqoyotho b’Suriya. Lu knuşyano mıştawtafle i qadişutho du fatıryarxo di cito Suryoyto Qatholiqoyto Mor İğnatiyos Yusıf III Yunan, i qadişutho du fatıryarxo da Suryoye Malkoye Qatholiqoye Mor Yusıf Alcıbsi, u rişizgado du Vatikan b’Darımsuq kardinal Maryo Zenari wa hsayo rişone da citotho Qatholiqoye d’Suriya.

 

Bu futoho du knuşyano, fatıryarxo Yunan mahkele cali mıştawtfonuthayde li sunados da hsayo d’Roma, ucala hedriyat di dawra trayonitho du sunados dgıdmitaybo bu yarho d’Teşrın u Qamoyo bi şato da 2024, dilonoyith di qadişuthayde hadomo’yo bu Mawtbo di mşawronutho di sunados d’Roma.

 

Bıthır fatıryarxo Yunan mahkele cali sbutho di golutho dkımşaklo qento rabo lu dactid di cito ulu camaydan b’Suriya u mırle; Şroroyo di golutho kıtla mede msimono mi xasra da yuthrone dıkmimodi ma nesyune da mardwotho uda mkone dkıtte a athrawotho hrene, elo adyawma i golutho kxılqo xalyutho rabtho ba citothaydan. I qadişuthayde kali’ste dilonoyith cali golutho di claymutho ucalu ruhqayda mi cito mi celtho da şartat dkıtne idice wu tathir dıktore u medano calu dactid di cito gawonoyith.

 

Camgabıdathe, fatıryarxo Yunan naqla hreto grışle u zuhoro cali sbutho dmihayıd u siqumo du cedo di Qyamto b’Suriya, u mahwele’ste sabro du Mawtbo da rişone da citotho Qatholiqoyotho d’dorış i sbuthathe, udı moyıd u fusqono dıkşowe li towutho di cito uda mhaymne. Bu knuşyano dgımdawım hol yawme d’Şabtho dıbqamuthayna, a mıştawtfone gıdorşi sebwotho citonoye; a mşablınwotho dıksaymi a marciyotho leşan an abne di cito bu maşıqlo casqano.