Morning Star hula tebo i kampanya du Sayfo dmabdiyole ESU

‘A Suryoye, dkıtne qalilto etnikoyto u tawdithoyto bu Madınho Mescoyo, mabdelın kampanya da imdat leşan dtulbi mu parlamento d’Urifi dmawde ruşmoyith bu Sayfo dan 1915’ a melani di dafo Britanoyto d’Morning Star’ne.

 Bu tebo dıfris bi dafathe, griş u zuhoro calu Huyodo Suroyo d’Urifi-ESU, dkobıc bi mawdyonuthathe du Huyodo d’Urifi, dımhalıx lfuth i şrorutho makthabzabnoyto wi kinutho la dıbhe du Sayfo.

 I dafo Britanoyto d’Morning Star, frısla bu mınyonayda u haroyo tebo cali kampanya da imdat dmabdele u Huyodo Suroyo d’Urifi-ESU. Bu şuroyo du tebano mahke calu camaydan dkıtyo qalilto etnikoyto u tawdithoyto bu Madınho Mescoyo wi kampanya dmabdıyo leşan u parlamento d’Urifi ruşmoyith dımawde bu Sayfo dan 1915, dıqtil ebe hol 500 alfo neşe, tloye u gabre mi mamlaxtho da Cuthmanoye.

 Bi dafathe mawdıc d’ESU kobıc bi mawdyonutho di şrorutho du makthabzabno udi kinutho, du Huyodo d’Urifi dmathkır 15 bu yarho d’Hziron, u yawmo da Sohde du Sayfano dsımwo meqım mo eşne. ESU kıtle sabro dıqodır dmahwe lu kenşo Emwothoyo kule, dkıtle snodo rwiho ma parlamentowiye du Swed, d’Almanya, d’Hollanda, Austuria, Suriya u Armenia leşan dmoyıd i sbuthathe jıddi li ido.

 Bu tebano Morning Star kımahke cali egartho dfrısle ESU u dıkmitahke eba calu Sayfo dsim calu camaydan, u mafqono qaşyo, u aydarbo jbir u camaydan dhowe Maşılmono, aydarbo manhıbi u mahrıwi ba mowat d’citotho, dayre b’Turabdin, Hakkari u Van, Urmia u Adiyaman.

 Mawdıcste du tukoso Emwothoyo da yadıcthone dcalu qtolğenso mawdewole ba 2007, dsim qtolğenso cala Mşihoye bi mamlaxtho da Cuthmanoye beyn da eşne 1914 u 1923. Bu huthomo du tebanoste mawdıc, du qtolğensano dsim i mşaluthayde d’Turkiya’yo uda Kemalist qamoye du gabo Qutnuthoyo da Came, dheş kmdawmi dmankırile.