Mqadım rmoyto leşan imtaksonutho du kontenjan u menyono da kursiye dımbayni lu camaydan bu parlamento d’Arbil

U koalisyon di Hdoyutho Umthoyto du camaydan bu parlamento du qlimo d’Kurdistan du Iraq, mqadamle rmoyto li rişonutho du parlamento bi sbutho du kontenjan du camaydan wu sutorayde mi mudaxala da gabe Kurdoye du qlimo.

 Bi rmoytayde, u koalisyon tlıble dmitazıd u kontenjan du camaydan lı casro kursiye, u belhude lu camaydan dmitahwe u zedqo dhuwe dımbayın a mathlonayde bu parlamento du qlimo d’Kurdistan.

 A hadome du koalisyon di Hdoyutho Umthoyto du camaydan bu parlamento du qlimo d’Kurdistan du Iraq, mqadamlın rmoyto li rişonutho du parlamento leşan i mtaksonutho du kontenjan awkith u menyono da kursiye dımbayni lu camaydan u Kaldoyo-Suryoyo-Othuroyo bu parlamento d’Arbil.

U koalisyonano dıkmişakıl mu Mawtbo umthoyo Kaldoyo, mu gabo d’Bethnahrin Demoqratoyo u mu Tukoso d’Şlama, mawdacle dkobıc dmisım u sutoro du kontenjan du camaydan mi mudaxala da gabe dlatne Kaldoye-Suryoye-Othuroye, u belhude dmitasır u kontenjan cama qole du camaydan. Awkith anabne du camaydan belhude dhowelın zedqo dımnaqın a mathlonathe bu parlamento d’Arbil.

U bu şıkılano gıdmısxori a tarce kulle bfothe da nuqoşe dkito bhaq dhın gabe du camaydan dıkmıthomi dkıtne masre cam gabe hrene nuxroye. Bebzabno, a hadome du koalisyon du camaydan mawdaclın dhınne kıbciste dsaymi u sutoro du kontenjan du camaydan mi mudaxala dhın ma gabe Kurdoye u mu tathir mrimono dkıtte cali surto wi şaxsiye da qoyume du camaydan.

Calathe, u koalisyon di Hdoyutho Umthoyto du camaydan bu parlamento d’Arbil, bi rmoyto dımqadamle, tlıble dmibayın yawmo dilonoyo dmigabın a mathlone du camaydan, u dmitahıt sanduqe dilonoye u lohiyotho dan ışmone dgımnaqın a mathlone du kontenjan du camaydan, u bebzabno tlıbleste dmitazıd u menyono da kursiye du kontenjan du camaydan me 5 l’10 kursiye.