14/02/2021

Mşadır ban alfayo dfolhe da hayle Şica l’Şigor

Mşadır ban alfayo dfolhe da hayle Şica d’Haşıd al Şacbi li fnitho da Ezidoye-Şigor bu garbyo du Iraq.

 A hayle Şica mşadri li fnitho, xıd funoyo la hçome dmabdela d’Turkiya calu gerilla di PKK b’Gare u Nuhadra.

Lfuth u tebo dfris b’dafe Iraqoye, a hayle Şica du Iraq mşadarlın ban alfayo ma folhathe ld’Şigor bıthır ma gzome dsımwola Turkiya dmabdıyo cuqobe hathe calu gerilla di PKK ba turone d’Gare u d’Nuhadra bu garbyo du Iraq. Mawdıc da 3 ğrobe folhoye da Şica, mşadri lu madınho lu macırbo wu tlithoyoste lu turo d’Şigor.

Ha ma rabayhaylawotho da Şica mırle; Gdımfanena bido du fuladh. Lo Turkiya, lo i PKK u loste ğer, kibın dımhadıdi i fnitho. Hol dkıtna ahna harke lıkobina aftho dmımhe bu qlimano qay u Iraq latle morutho d’ruhe? A cuqobani d’Turkiya mşarewolın, bıthır mıd u waziro du sutoro d’Turkiya sımwole socurutho l’Boğdod u Arbil meqım yarho.

Hulusi Akar u drışwole i sbutho di ithutho di PKK cama 2 şultonwotho. Meqım şatoste sımwolın a hayle kaboşe d’Turkiya cuqobe cala dukotho di PKK b’Şigor. Bıthır mıd twırwo u haylo d’Dacış b’Şigor, mşakalwo ğrobe folhoye frişe; beynothaye da Ezidoye, leşan dsaymi u duyoqo di fnitho.

Elo i mşaynutho di fnitho heş bu qentoyo u lo bınyo u loste mhathıtho mu husrono dhzewola ma hçome d’Dacış ba 2014. Bi şato dşafıcinaste mdewola Boğdod u Arbil qyomo leşan i mşaynutho d’Şigor u tlıbwo ma hayle kulle dtorın ma zaynathe. Elo a comure Ezidoye lo maqbewolın u qyomano. A hayle Şica, kımşakliste qento li ithutho du camaydan bi daşto d’Ninve.