01/07/2020

Mşale mşahlıfe hawilın hfuxye mqabıl du qedomo d’Erdoğan

Bu zabno haroyo a sturye wa hfuxye dımqabıl du rişqutno d”Turkiya Recep Tayip Erdoğan mqqa dkothe kzaydi.

 U rişqutno d’Austurya, me gabo wu rişono du gabo di CHP, wu rişono du gabo d’DEWA sımlın sturye qaşye Erdoğan.

Bi sbutho di qale dhawiwo bayn da mtagılyone Kurdoye u la Turkoye bu athro d’Austurya u rişwazire du athro d’Austurya Sebastian Kurs hule maqırhonutho u mırle lıgdobina darbo dmitacbıri a qatre dkıtla Turkiya lgawed du athro.

I sbuthathe qdıhwola bu zabno da mothonoye Kurdoye mtayabwolın taglitho mqabıl da hjome dıksaymo Turkiya cala came, a turkoye tuxmonoye sımwolın hjomo u nafıqwo qale bayn latre gabe u la pwelıs du athro u la turkoye tuxmonoye.

Kurs bi maqırhonutheyde thımle Erdoğan bi fıtne, u bu tehriwo u mırle lıgdobina darbo l’Turkiya dmıstacmılo u mınyono da barmothoye dkıtla bu athreydan laşan i manfaca druha.

Bıthır mi maqırhonutho dsımle u waziro di baroyutho d’Turkiya dıthımle u athro d’Austurya bi sbuthathe, u rişwaizre b’qaşyutho krıhle u mamlo du waziro dı Turkiya u mırle bi qale dhawi mjarıh 7 pwelıs, tro Turkiya dıdco naqa hreto lıkmaqıblina dnuqlo a qatre dkıtla lu athreydan u bi sbuthathe gıdhowina naşife lıgmahwina mrahmonutho.

Me gabo hreno u rişono du gabo hatho DEWA Ahmet Davutoğlu bi maqırhonutho dsımle bhaq du sxoro dıhdo ma bethsawbe dhiye sımwole u futoheyda mırle. Erdoğanyo u rişo di harbutho dkowe bu athro, hanoyo u rişqutno dkobe yuqro lu tecmiro  da geşre u ğeyr, u me xasra hreto ksoxır qımu yulfono u qumı du şuşoto du athro.

Me gabo hreno u rişono du gabo di CHP Kemal Kılıçdaroğlu bi maqırhonutho dsımle bhaq di tahrazto dhawiwole Erdoğan cami claymutho mırle i claymuthoyo dıgmadıryo u quşco Erdoğan mi rişonutho du athro.

Check Also

YPG maglela cali hiyoyutho da Sohde dmahrawla Turkiya wa marhıbonayda a bethqburathe b’Cafrin

Bi maqırhonutho dıfrıslın a Haylawotho du sutoro du Camo-YPG, maglelın cali hiyoyutho da S…