Mşale u rişone dı citotho du cameydan mhanelın Qoyumo Tuma Çelik dhawi u qolo du camo

Bıthır mu fusqono dhule u bethdino d’Turkiya dımbarele u qoyumo du cameydan bu parlemento d’Turkiya Tuma Çelik mşarelın a telefone wa egrotho dothın bıthre dıhdode laşan dımhanın u qoyumo dhawi u qolo du cameydan b’Turkiya.

 Baynothaye Mor Diyosqoros Benyamen Ataş mor Filiksinos  Yusuf Cetin ba casrowat mşale da mawtbe da citawotho mşale d’şutose u kohne ma citawotho du cameydan mhanelın u qoyumo dnafıq zakoyo ma thome dkıtwo acle.

Bi mawdconutho dmıdlan mu qoyumo du cameydan Tuma Çelik mawdacle dbıthır mu fusqono du bethdino dmaqımle athome dkıtwo acle a telefone wa egrotho calu darbo du nawlo u bebzabno u tboco froso frısle u tebano u mafıshono dhawi lu camo Suryoyo-Othuroyo.

U efetrufo fatıryarxoyo di marcitho du Swed Mor Diyosqoros Benyamen Ataş camu  rişono di marcitho Yılmaz Bısse wu mşalo da esore baroye u bebzabno dkıtyo u tahlufo du rişono Suleyman Kurt mtalfanlın u mhanelın u qoyumo du cameydan Tuma Çelik dkıtwolın mu yawmo qamoyo tuxlono ebe dıgfoyış u qolo du cameydan bu parlemento d’Turkiya. Bu mamlo dsımle Mor Diyosqoros mırle hate u şubhoreydanhat u hate u qolo du cameydan bu parlemento d’Tukiya u kıbcina dı fayşıt qulnaqla hawxa zakoyo ba fulhoneydox lu cameydan.

Me gabo hreno u efetrufo fatıryarxoyo di marcitho d’Stanbıl u d’Ankara Mor Filiksinos Yusuf Çetin dımhanele u qoyumo mırle unhoteydux u nhoto du cameydanyo wu rumromeydox u rumromo du cameydanyo ahna hana bkul mede.

U efetrufo fatıryarxoyo di marcito d’Merde d’Omid u hedora Mor Filiksinos Saliba Özmen mhanele u qoyumo du cameydan Tuma Çelik u tlıble kuşore ba fulhone dıksoyım lu cameydan u dıgmacle rişeyna bınne.

Megabo hreno hadome du mawtbo di marcito d’Almanya mhanelın u qoyumo Tuma Çelik dnafıq zakoyo ma thome dkıtwo lo şarire bhaq dide.

Bcayni zabno rişone da mawtbe da citawotho d’Almanya du Swed d’Swisra d’Belçika cam kohne mtalfanlın u tlıblın tahınyotho lu qoyumo du cameydan bu parlemento d’Turkiya Tuma Çelik.

Bebzabno u şutoso d’DETA da qıryawotho a mathlone da citawotho du cameydan dkıtne b’Turkiya di cito Kaldoyto di cito Suryoyto qatholiqoyto u di cito protestanoyto wu rişono du waqıf d’Mırde İliya Kırılmaz u ba alfowat mu camo mşadare a tahınyotheyde calu darbo du nawlo lu qoyumo dhawi u rımzo du qolo du cameydan b’Turkiya.

A mgabye da qırywaotho d’Turcabdin mtalfanlın u tlıblın tahınyotho lu qoyumo şaryo du cameydan dkıtyo u qoyumo me Mırde Tuma Çelik.