Mşalo di şabake hayobe d’Södertelje du Swed hkim li hbuşyo di 11 eşne

SODERTALJE, Swed – Hdo ma celotho dlıkqodır u polis Swedoyo dmakle u cnufyo da şabakat hayobe du athro, i mtaksutho da fulhone lo qonunoye dıkmaşın a ğrobani bğer athrawotho’yo. Vanja Mijliç ha ma mşale da şabakat hayobe du Swed, dıkmdabarwo a fulhone lo qonunoye da gelone mtanwone bu athro d’Serbia’yo.

U farsufano msıkwo b’Serbia u bıthır maslamwo lu Swed bu yarho d’Şbot u ftıhwo bethdino mqabıl dide. Athmıl’ste mıdle u bethdino d’Södertelje fusqono u hkımle l’11 eşne hbuşyo cala hawbe qaşye da fulhonayde da gelone mtanwone. Camgabe da eşne dımçaze, klozım u hayobo dobe’ste 600 alfo krone li dawle cala zuze dqmırle mu zebono da gelone mtanwone.

Vanja Mijliç dkıtyo hedor 40 eşne, ha ma 600 hayobe dıkmdabri a hçome wa hawbe dıkmisomi bu Swed’yo u msıkwo ba 2023 mu polis d’Serbia bi arişkoyto Belgrad ubu baytayde mqafewo 11 telefone di ido uğer alat du elektronik dıkmadili, cala esore dkıtwole cama ğrobe kriminell dhayriwo calu zebono da gelone mtanwone uda zayne.