14/12/2023

Mşarela i hedriye da guboye da Mawtbe da hiğmonwotho bu Cıraq

U şutoso d’Almuraqeb, mawdacle dımtayable hul alfo farsufe hfite laşan dsaymi u duyoqo du maşıqlo da guboye da mawtbe da hiğmınwotho du Ciraq, bnişo dmımte l’guboye hire u şafye udmitahwe mawdconutho rwihto lu ray gawonoyo du Ciraq cala maşıqle kulle da guboye. U rişono du şutoso d’Almuraqeb Bakır Aljabburi, mawdacle dgıdforıs alfo farsufe hfite dgıdsaymi duyqoo magon ba fenyotho kulle di erişkoyto d’Boğdod. a’farsufani gıdmaltımi mawdcınwotho ugıdsaymi u nuholaththe, ubebzabno gıdsaymi ste u duyoqo da maşıqle mşahılfe da guboye.

 

M’gabo hreno, u mşalo du tboco froso du makıthbo d’Kerxıslox du komisyon celoyo şaryo da guboye Cali Dhiyab, mawdacle dımbayın zıd m’27 alfo farsufe laşan dsaymi u duyoqo da guboye du mawtbo di hiğmonutho d’Kerxıslox, baynothaye zıd m’13 alfo dkıtne masre cam şutose du duyoqo, u zıd m’14 alfo hrene dkıtne masre cam gabe folitiqoye mşahılfe.

 

Dhiyab mathkarle ste dkito 43 qentrune b’Kerxıslox laşan a’mgabyone dımqadmi ruhaye la guboye, ukito ste 318 qentrune dgıdmitahwe u qolo ebaye. Dhiyab mawdacle ste du menyono da mgabyone bi hiğmonutho d’Kerxıslox kmote l’hedor d’malyun u 154 alfo farsufe. A’guboye da mawtbe da hiğmınwotho du Ciraq star ma hiğmınwotho du qlimo d’Kurdistan, kmıntır dmisomi 18 bu yarhano, wu komisyon celoyo şaryo da guboye sımle duroşe la falohayde ula şutosayde, xıd hıdriyat lu garanti dmisomi a’guboyani b’şafyutho ub’zalilutho.

 

Camgabıdathe, i şultonutho d’Boğdod, frışla qariwo l’70 milyare dinare-awkith 45 milyone dolare, leşan u qlimo d’Kurdistan dqodır dsoyım a guboyayde 25 bu yarho d’Şbo di şato dıbqamuthayna. Bu knuşyo dsımle u Mawtbo da wazire du Cıraq, mıdle 43.7 milyare dinare mu Komisyon celoyo u şaryo da guboye du Cıraq u 25.5 milyare dinare mi butçe di mcadronutho msarhabto du qlimo d’Kurdistan, leşan dmisomi a guboyani du qlimo bu zabno dımbayın.