Mşarele u knuşyo dan 34 du Huyodo Caraboyo bi arişkoyto du Cıraq Boğdod

BOĞDOD – U rişqutno du Cıraq Abdul Latif Jamal Rashid, sımle adyawma u futoho du knuşyo dan 34 du Huyodo Caraboyo dımtayıb adşato b’Boğdod. Lu knuşyano hadiri an athrawotho hadome du Huyodo Caraboyo cam mınyono d’mşale d’tukose Emwothoye-beynothaye u notarozo gawonoyo d’Emwotho Mhaydotho uğer. Bu mamlo du futoho du knuşano u rişqutno Latif mırle; U qlimaydan kıloqe bu maşıqlano b’qente rabe dıkmşakli gzome li mşaynutho, lu dactith du camaydan uli moruthaydan.

Latif sımle’ste qroyto, da qetrani klozım dmışroyi b’mşaynutho u darbo du dialog. U notarozo gawonoyo du Huyodo Caraboyo Ahmed Aboul Ğeit bu mamlayde mqadamle zuhoro qaşyo la Houthiye d’Yemen, dıkmahrıwi i mşaynutho du qlimo.

Aboul Ğeit, sımle sturyo a hayle msalhe wa siyasat nuxroye dmahrıwi i mşaynutho b’Yemen, b’Suriya, b’Lebnon ubı Ğaza. U notarozo gawonoyo d’Emwotho Mhaydotho Antonio Guterres bu mamlayde sımle qroyto l’şalyuthzayno b’Ğaza u krıhle i golutho dıkmisomo lo bu sebyono du camo u tlıble dmitarfın a htife kulle.

Cali sbutho d’Lebnon tlıble Guterres da gabe kulle dımyaqri i morutho du athro, dmıkle calu kriz noşoyo d’Sudan u dmitakle u cnufyo wa taxtuşe dıkmdawmi b’Libya. U rişqutno d’Mısır Abdul Fattah al Sisi’ste sımle İsroyel sturyo u mawdacle dıksaymo qtolcamo b’Ğaza. U rişwazire du Cıraq Mohammed al Sudani maglele cali paketa d’20 milyone dolare dımcadronutho leşan u hethotho d’Ğaza, 20 milyone hrene l’Lebnon u m’akadle, dgımdawmi i methcadronuthathe cam Suriya leşan u duyoqo di mşaynutho da thumathe.

U rişwazire d’Spania’ste dhadır xıd dayfo, sımle mamlo karyo calu maşıqlo ucali ulsoyutho du terkiwo du şlomo. U rişono zabnoyo d’Suriya Ahmed al Şarıc lo hadır u knuşyano cal dheş kito amro catiqo du msokayde bu Cıraq u calathe mşadarle u waziro di baroyutho al Şibani. İnaqla harayto dsımwola Boğdod baytoyutho lu knuşyano du Huyodo Caraboyo ba 2012’we.