Mşatis adyawma u Mawtbo Athronoyo Madınhoyo bı Darımsuq

DARIMSUQ, Suriya – m’athronoyo u makthabzabnoyo bu bnoyo du athro, udhowın hınne ste mbaynone du maşıqlo folitiqoyo hatho d’Suriya i hirto, şritho, mgawanto, demoqratoyto dıkhıbşo b’gawa an’abnayda kulle dlo furşono. 

Bu buyono du şudoco, kmitawdıc da Mşihoye d’Suriya falqo dlıkmıflığyo mu kenşo mdinoyo, ruhonoyo u noşoyo du athro, ukdıcro i şkihuthaththe l’alfawo d’ışne. Bebzabno, a’Mşihoye d’Suriya mıştawtaflın b’şıkıl hfito ba dore mşahılfe dşaficina bu bnoyo da mdinoywotho madınhoye ma Kancanoye, a’Finiqoye, an’Orumoye, a’şımroye, an’Akadoye, a’Bıbloye, an’Othuroye, a’Kaldoye wa Suryoye. 

U buyono mathkarle ste da Mşihoye d’Suriya maqwelın a’timoyotho di methfathonutho udu teqbilo du hreno, u mıştacewolın u dawro rişoyo bi mşatsonutho du athro hatho d’Suriya, ubu şuşoto du yulfono, di mardutho udi hiyoyutho athronoyto mkanaşto. 

Lfuth u buyono dıfris, u Mawtbo Athronoyo Madınhoyo kıtle u nişo dımmathıl a’Mşihoye d’Suriya ba haye folitiqoye u mdinoye, dımdafıc a’zedqaththe bu haqlo athronoyo u tawdithoyo u marduthoyo, dmıştawtıf lu bnoyo d’athro di barmothoyutho dkımqadım b’şawyutho la hayoywotho umthoye u marduthoye u tawdithoye, dmaqwe a’gawne marduthoye u tawdithoye xıd asas di hdoyutho athronoyto, dnofıq moro la diloyotho di hiyoyutho Mşihoyto, di mardutho, udu leşono emhoyo, udmitıctarıf bi hiyoyuthaththe i umthoyto xıd falqo mi hiyoyutho athronoyto mkanaşto d’Suriya, udmisım u garanti di hirutho di haymonutho. 

Callathe, u buyono mawdacle dıkmisomi ucdo a’hıdriyat laşan dmitayıb calqariwo u Konferans mşatsono du Mawtbo Athronoyo Madınhoyo bi mditho dı Darımsuq, u sımle ste qroyto la n’abne du camaydan ba madhhabayde kulle uba fenyotho mşahılfe d’Suriya dmıştawtıfi lu konferansano.