Mşatıs mawtbo hatho li marcitho d’Caynkawa. Sim u futoho du haykılo du qadişo Mor Gorgis

CAYNKAWA, Ciraq – Bi rocyutho di qadişutho du fatıryarxo di cito d’Madınho d’Othuroye Mor Awa Roel, mnaqe mawtbo hatho li marcitho fatıryarxoyto d’Mor Yuhanna Macımdono bi qastra d’Caynkawa bu garbiyo du Ciraq.

A’hadome du mawtbo hatho dıkmişakıl m’10 farsufe baynothaye hammış neşe, ymelın ste ruşmoyith li wolithaththe i hathto qum du kohno di marcitho qaşişo Marten Nabil uda mhaymne kulle dhadriwo bi cito d’Mor Yuhanon Macımdono b’Caynkawa. U mawtbano dkımrayşanle Rony İshaq, mnaqyo ste Florin Gewargis mcadronitho ele.

Mxasra hreto, i marcitho d’Mor Gorgis di cito Kaldoyto dı Tellısqof di daşto d’Ninwe, huwola ba yarhe dşaficina teklif lu amnoro u nahoto idico du camaydan Thabet Mixael, laşan dsonıc haykılo du qadişo Mor Gorgis dkıtyo u şfico di qastra dı Tellısqof.

U haykılo d’Mor Gorgis bıthır mıdkamıl u snocayde sim 23 bu yarhano u futohayde bi rişonutho du mcadrono fatıryarxoyo di marcitho d’Alqoş hasyo Mor Bulıs Thabet, ubi mıştawtfonutho d’menyono d’kohne u dayroye u dayroyotho u kunoşo rabo mu camaydan dı Tellısqof, baynothaye menyono celoyo d’nacime.

U haykılo du qadişo Mor Gorgis sim u futohayde bu yawmo şatonoyo du duxronayde dıknofıl 23 bu yarho d’Nison mkul şato. A’masrafe du bnoyo du haykılo mqadmi mi knuşto Kaldoyto dı Tellısqof di mcadronutho dkıtyo u qentrunayda bi mditho d’Santyago bu athro d’Kanada.