Mşatıs şultonutho hathto bu athro d’Tunıs

Bu athro d’Tunıs mşatıs şultonutho hathto teknoqrat bi rişonutho d’Hişam Almışeşi, bnişo dmaqwiyo u momuno hariwo du athro, u dfırşo ruha ma krize folitiqoye dkito bu qlimo.

 Megabo hreno, u athro d’Aljazaer mawdacle ha bu yarho dı Teşrin u Haroyo dıbqamuthayna gıdmisım funcomo calu nomuso esonoyo hatho dıkmaqwe i demoqratoyutho b’gawıd du athro.

 U rişqutno d’Tunıs Qays Scayyıd, huwole bu yarho d’Tamız dşaficina teklif lu waziro catiqo di gawoyutho Hişam Almışeşi, laşan dımşakıl i şultonutho hathto bıthır mıd mıstacfewole u rişwazire İlyas Alfaxfax mi wolithayde.

Calathe, u rişwazire hatho Almışeşi dcımre 46 eşne yimele athmıl li wolithayde bıthır mıd mawdacle i şultonuthayde i hathto dkıtyo şultonutho teknoqrat awkith frışto ma gabe folitiqoye, u hatheste bnişo dmaxılso Tunıs mu krizayde u momunoyo, u dfırşole ma krize folitiqoye dıkmdawmi bu qlimo.

Li şultonuthayde i hathto Almışeşi mbayanle Walid Alzaydi waziro di mardutho u dkıtyo u waziro qadmoyo samyo bu makthabzabno d’ Tunıs. İ şultonutho hathto sniqoytoyo ucdo dmitahwela ruşmoyutho mu parlamento, u dothe dılo mtaqbılo, i naqlayo u rişqutno kıtle u zedqo dşore u parlamento u dsoyım qroyto l’guboye hathe.

Me gabo hreno bıthır ma tagılyotho dımdawamlın ba yarhe, i rişqutnutho d’Aljazaer bu buyono dıfrısla athmıl, mawdacla dgıdmisım ha bu yarho d’Teşrin u haroyo dıbqamuthayna funcomo calu nomuso esonoyo hatho du athro, bnişo dmitaqwiyo i demoqratoyutho u dmitahwele u parlamento dawro rabtır bu terkiwo du dactid d’Aljazaer. Lfuth u buyono dıfris, u siqumo du funcomo mbayın bıthır mi ytawto dhawile u rişqutno Cabdılmajid Tabbun camu rişono di şultonutho athronoyto şritho da guboye Muhammad Şarafi.

Tabbun bu zabno dımnaqewo rişqutno bu yarho d’Konun u Qadmoyo dşaficina, huwole şudoyo dgıdsoyım şuhlofe folitiqoye u momunoye xıd funoyo la talabe da mtagılyone du protesto dmadrewolın u rişqutno catiqo d’Aljazaer Cabdılcaziz Butafliqa mi wolithayde bu yarho d’Nison i şato da 2019.