MSD frısle buyono bi cohnutho du yawmo şatonoyo da10 ışne du qawmo d’Suriya

 U Mawtbo d’Suriya Demoqratoyto, frısle buyono bi cohnutho du yawmo şatonoyo da 10 eşne du qawmo d’Suriya. İ rişitho du buyonano’ste mahıt ışma; U qawmo da Suriye, lıkmitakle!

Bu buyonano MSD komır; Walaw cayişina casqutho rabtho u laqina qetre mi saqıbloyutho cala nişe dımbayni bu qawmano, elo naqla hreto heş kito sabro di Mdabronutho yothoyto dqudro dmarkıwo mşaynutho u şalyutho b’dukotho frişe du athro.

Bu buyonano dfrısle u Mawtbo d’Suriya Demoqratoyto-MSD, frışle duktho rwıhto cala fulhone dmaşela i Mdabronutho yothoyto du garbyo udu madınho d’Suriya wu ağono dhuwlın a Haylawotho d’Suriya Demoqratoyto bu snodo du koalisyon Emwothoyo leşan u qşoco da tukose marhıbone man arcotho d’Suriya wi qroyto dsımle MSD leşan u huyodo athronoyo wu terkiwo di demoqratoyutho.

MSD kali cala gedşe u cala tagliyotho dsimi bu şuroyo du zawco du qawmo d’Suriya meqım 30 3şne u aydarbo u rejim b’darbone frişe mıstacmele u sebyono du camo u dmacbarle a tukosayde bıgawe du kenşo, i folhutho wu qedomo qaşyo dhawi bu şıkılano cala bnaymothoye bnişo dlo maclın rişaye mqabıl dide. Elo u camo lo dacır ma talabayde u mabdewole u şıkılano u qawmo bu yarho d’Odor da 2011.

MSD mawdacle bu qawmano u camo kımdawım dsoyım qroyto li hiruthayde u mathabe frişe du kenşo d’Suriya bıdele dtolıb dmihaşıw u rejim. U walaw u qawmano kıloqe b’casqotho u qetre, elo u camo kımdawım dtolıb a zedqayde u kıtolıb mu kenşo Emwothoyo’ste dsonıd i Mdabronutho yothoyto ba fulhone dmaşela leşan u terkiwo du şlomo udi mşaynutho bu garbyo ubu madınho d’Suriya.

Bu ağonano’ste a MDS sımle qroyto la hayle demoqratoye dımhaydi u haylathe leşan dqudri dobın funoyo la sniqwotho da came du qlimo u dqodır’ste u camo dobın funoyo b’neshono mqabıl di lo qonunoyutho da guboye dıkmibıc dmisomi b’Suriya leşan u rejim d’al Asad dımdawım i mdabronuthayde i qşitho. A came frişe d’Suriya, kıtte sniqutho l’mdabronutho demoqratoyto lo qenturnoyto u nomuso esonoyo hatho, dıkm’athıl a came du athro kulle.