MSD sımla qroyto lı Turkiya dımbatlo i siyaseyda di bcelıdbobutho

Me gabo hreno u Mawtbo d’Suriya Demoqratoyto, sımle qroyto l’Turkiya dımbatlo i siyasayde di bcelıdboboyutho u dmaslımole a şlade da Sohdayde.

İ maqırhonuthathe d’MSD friso, bıthır mıd a hayle kaboşe d’Turkiya wa marhıbonathe, hfırwolın u mawfaqwolın a şlade da Mharbone di YPG b’Afrin u dıthımwola QASAD dsımlın qtolcamo bi mdito.

A hfuxye da şutose frişe di Mdabronutho yothoyto du garbyo udu madınho d’Suriya mqabıl du tehriwo da qabre da Sohde da Haylawotho du Sutoro du Camo-YPG b’Afrin, kımdawmi dlo kıloyo. Ucdo’ste u Mawtbo d’Suriya Demoqratoyto frısle maqırhonutho u tlıble me Ankara dmaklıyo i bcelıdboboyuthathe u dmaslımo a şlade da Sohdathe-d‘qtiliwo ba 2018 ba taxtuşe dhawın’wo bu zabno d’Turkiya kbışwola Afrin.

Bi maqırhonuthathe MSD mawdacle, du hforo udu tewfiqo da şlade da Sohdathe, hawbe jıddi’ne u klozım baroyo dmitadcıri. MSD maglele, bıthır mıd mawfıqi a şlade, frisi bu tbocofroso u thımlın QASAD bu qtolcamo ubı hawbe du qrobo. Lfuth hın mabuce, kıtwo 71 Sohde ba bethqburani;40 menaye i hiyoyuthathe idıcto’yo, 5 mdinoye’wın wa 31 hrene heş latyo i hiyoyuthathe m’akadto.

Calathe MSD krıhle a hayle kaboşe d’Turkiya cala tebe lo şroro dfrıslın u dabici dımlakki ışme d’QASAD wa qurbone dhuwlın. Qriho’ste kımahwe du qedomano d’Turkiya, snodo da ğrobe marhıbone’yo. MSD krıhle’ste u qedomo du polis qlimo d’Afrin dkıtyo masro cama Turkoye dkıtyo u nişayde d’xolıq jğuşyo beyn du camo’yo.

MSD dsımle qroyto li şultonutho d’Turkiya dmaklıyo a camlani u d’tulbo şubqono ma yaqrotho da Sohde, mawdacle’ste dıksonıd a yaqrotho wu haşathe u tlıble mu kenşo Emwothoyo dımşakıl sictho dsaymo buhone u dımhaşwo a hayobe da gunhani-dkıtne hawbe mqabıl di noşutho u dsimi ma hayle kaboşe d’Turkiya uma marhıbonathe, bnişo dmahti ido calan arcotho u mulkone du camo udlo torın da mdinoye ducri la dukothathe.