Msik 16 fqide du limone d’Beyrut cala furqoce dhawi u atagliyotho mqabıl di şultonutho kımdawmi

Msik 16 fqide du lmino d’Beyrut, bıthır ma furqoce qaşye dhawın bi arişkoyto bu şuroyo di şabthathe. Beyn da fqide dımsiki kito u mşalo du lmino u mşalo du gumruk.

 Bebzabno bıthır mu şok dhawi cala furqocaniste, bıdele ucdo u camo dmahwe u hfuxyo wu ruğzayde mqabıl di şultonutho Lebnonoyto.

A fulhone di mcadronutho msarhabto heş kıkurxi beyn da shifotho, leşan dmiqafın a mvayce wu camoste kıkorıx beyn da bethkrihe, leşan dımqafe a hadome di iqarthayde bıthır ma 2 furqoce qaşye d’Beyrut dıtrelın haşo rabo b’Lebnon.

I mcadronutho dımwacade anathrawotho dıbritho leşan Lebnon’ste, bıdela ucdo d’mıtyo lu athro leşan dmifarqo la 300 alfo bnaynoşo dfayişi dılo bote u la farsufe dımjarhi ba furqocani.

A 2 furqoce dhawın yawme d’Tlotho dı şafıcina bi arişkoyto d’Beyrut, trelın u athro dhowe falj wa mşale kıkurxi cal noşo dmatcıni u gunhano dhawi bi mditho. Calathe 16 fqide du lmino d’Beyrut; beynothaye u mşalo du lmino wu mşalo du gumruk uğer falohe di mşaynutho du lmino msiki la buqore.

Athmıl casriyeste, mtayıb tagliyotho du protesto mqabıl di şultonutho u bıthır mi mudaxala dsımle u polis, nafıq taxtuşe beynothaye u mjarıh mınyono dfarsufe. Mawdıc da mtagliyone mawqadlın dukotho, manhablın dukane u mhalaqlın kefe bu polis wu huweste mıstacmele ğaz da damce ba mtagliyone.

Ramhıl yawme d’Şabthoste sim qroyto l’taglitho rabtho mqabıl di şultonutho du rişwazire Hassan Diab. Amtagliyone kımatcıni i şultonutho bu gunhano dhawi u tlıbbe da folitiqore du athro kulle, dmıstacfın ma wolyothathe u dmisım reforme hathe bu athro.