Msik hadome du gabo d’HDP u rişone zawgoye da karxwotho

U polis Turkoyo, msıkle naqla hreto mşale, folitiqore u hadome du gabo Demoqratoyo da Came-HDP.

 Beyn da msikoye da cuqobani dıkmdawmi calu gabo d’HDP, kito i rişonitho zawgoyto di karxutho d’Kars Şevin Alaça wu rişono zawgoyodu qlimo Cengiz Anlı.

U qtolcamo folitiqoyo dıkmaşyo Ankara calu gabo Demoqratoyo da Came-HDP kımdawım dılo kıloyo. Ba cuqobe dsimi adsafo cala bote da thimoye b’Kars, msiko i rişonitho zawgoyto di karxutho Şevin Alaca wu rişono zawgoyo du qlimo Cengiz Anlı.

Gawonoyith hiw amro du msoko d’19 hadome d’HDP u nqili lu hbuşyo ma thome di hadomutho b’tukoso lo qonunoyo. Bıthır mıd Ankara msıkwola ba yawmotho dı şafıcina 82 hadome u mşale du gabo, ftıhwo’ste dacwa dmitaqimo i hasinutho d’7 qoyume d’HDP.

Athmıl’ste naqla hreto, msikowa i mşalonitho du gabo di HDP du ferco d’Mersin Gulbahar Şöfer wu hadomo di sicto mdabronitho u be bzabno dkıtyo qoyumo bu parlemento du athro Barış Karabıyık. Ba msoke uba hçomani dıksoyım AKP cala hadome d’HDP, kımnase dmatım u gabano-dkıtyo u gabo ihidoyo dıkmaşe siyase di saqıbloyutho bu athro.