Msik u mşalo d’şabake da hawbe İsmail Cabdo bi Adane d’Turkiya

ADANA, Turkiya — İsmail Cabdo dkıtyo mawlodo dan 1990 kıtle emo Turkoyto u babo Lebnoyo; qayım b’Uppsala du Swed u kmidıc bu ışmo; u Çilak, farsufo hayobo bu Swed’yo uma 2024, u rişono di şabake d’Rumba’yo bıthır mıd flığwo mi şabake d’Foxtrot du Taclo Kurdoyo-Rawa Majid. A 2 şabakatani hani eşne kımharbi hdode calu pazar du zebono da gelone mtanwone uğer hawbe frişe dsımlın.

Beyn da 2 ğrobani, kito’ste hadome man abne du camaydan bu Swed dıksaymi şuğlone l’Cabdo u Majid. A rişone da 2 ğrobani’ste hani eşne yarixe kminase dmımsoki mu polis Swedoyo-u hatta me İnterpol. Elo athmıl b’cuqobo dilonoyo dsim beyn du polis Swedoyo, Norwejoyo u Turkoyo b’dukotho frişe di şabake b’Turkiya, msik İsmail Cabdo bi harayto b’Adana.

Camgabe d’Cabdo msik’ste 18 hayobe hrene; beynothaye 2 Swedoye, cama zuze dkıtwolın ba bankat, 20 radoyotho, 15 bınyone dbote u sahme b’şırak dıkmote u timathe l’1.5 milyare lira Turkoyto-awkith 360 milyone krone.

Elo cal d’Cabde dkıtle barmothoyutho Turkoyto’ste, Turkiya lıgmaslımole ucdo lu Swed hol dmisım u bethdinayde. Cabdo msıkwo inaqla qamayto ba 2024 b’Turkiya bıthır mıd mqafewo 1.3 tonat d’gelone mtanwone. Elo bıthır mıd Cabde huwole hedor 6 alfo krone Swedoye l’Turkiya, marfewo.