Mtayıb lumodo rwiho me came frişe b’Suweda leşan bazare cami şultonutho dı Darımsuq

SUWEDA, Suriya –  Bi baytoyutho du qentrun marduthoyo di mditho d’Suweda, mtayıb athmıl konferans folitiqoyo rwiho du diyalog dmıştawtaflele mathlone du zawco mşayno, da hayle folitiqoye, udu kenşo mdinoyo cam haylawotho di mşaynutho gawoyto u menyono d’rişone tawdithoye u hfite bu haqlo kenşoyo u mathlone hrene ma caşıryotho umu camo Mşihoyo d’Suweda. 

U konferansano mtayıb bnişo dmihaydo i klayto folitiqoyto u mdinoyto b’gawıd d’Suweda, udmımte l’awyutho cal hzayto mkanaşto dkımgaşmo a’nişe da n’abne di hiğmonutho d’Suweda, udıkfıtho u darbo b’qamuthıd d’şroye la krize dıkloqelın u kenşo gawoyo. 

Bu konferansano, a’mıştawtfone ba mamle dsımlın makadlın i ulsoyutho dmihalıq dawse lafu bnoyo d’klayto mhayadto dkımmathlo a’came u gawne mşahılfe d’Suweda folitiqoye, kenşoye u tawdithoye, dilonoyith bu taro da casqıwotho momunoye dıkqoşın udi fliğutho folitiqoyto dıkruho b’gawıd d’Suriya. 

Mbayn da fusqone ulsoye dmidi bu konferansano, dmişatıs grub ma came u gawne kenşoye u folitiqoye u tawdithoye d’Suweda, dkıtle i wolitho dmabde bazare cami şultonutho dı Darımsuq, bnişo dmisım u garanti du nfoqo du moro la zedqe du camo d’Suweda, udmıdrış u dactid da n’esore bayn dı Darımsuq wi hiğmonutho d’Suweda, b’şıkıl dkımqafe şroye şerşoye la qetre du yulfono, du momuno udi mşablonutho di hiğmonutho.