Mtayıb u bethdino qamoyo dıkhokım mşale du rejim d’Suriya ma hawbe d’sımme

Ftih u bethdino qamoyo mqabıl dıtre ma hadome da hayle di mşaynutho du rejim d’Suriya bu athro d’Almanya.

 U bethdinano mşarele adyawma mqabıl da thimoye du rejim, bu taro da hawbe dsımlın mqabıl di noşutho, teşniqe u cnufyo ğensoyo.

 Bi mditho d’Koblenz d’Almanya, mşarele adyawma hawıl bethdino dıkmisım, mqabıl d’2 thimoye ma hayle di mşaynutho du rejim d’Suriya. A thimoyani mawfıqi lqum di kinutho cala hawbe dsımlın mqabıl di noşutho, hawbe da teşniqe wu cnufyo ğensoyo. Lo u tbocofroso u loste u rejim d’Suriya mbahasle mede calu bethdinano.

 A farsufe dkıtne bıthre di kampanyathe, mawdaclın i fsihuthathe lu tuyobo du bethdinano, cal dkıtyo dawse qamayto lafi kinutho dban alfayo dıbnaynoşo dmafiti ba taşniqe ba qentrune du rejim. Ğalabe naqlat mnase dmitayıb bethdino Emwothoyo mqabıl da thimoye du rejim, elo camhbol lo najihiwo.

 Anwar al Bunni dkıtyo sniğro dcala zedqe noşoye u ha ma farsufe dmahıt bu hbuşyo qariwo l’Darımsuq mırle; A msoke, a taşniqe, u zayno rişoyo’yo dmıstacmıl mu rejim d’al Asad, leşan dıxolıq zuctho beyn du camo u dıdoyış a talabe di demoqratoyutho u di kinutho. U bethdinano, gıdtowır i hasinutho da farsufe dsımlın hawbe b’Suriya ma rişone du rejim uhola mşale hrene.

 Bu bethdinano mıstacmele u mqımdino Almanoyo qonune Tibeloye leşan u hkomo da 2 farsufani. A qonunani dkobın aftho, dmıhkım thimoye cala hawbe noşoye dsımlın bı duktho hreto bı britho. U thimoyo rişoyo Anwar R, mşalo da istixbarat’we u kmıthım bu qatlo d’58 farsufe bu hbuşyo d’Darımsuq dkibe hol 4 alfo farsufe hfite di saqıbloyutho.

 A hbişoyaniste mafiti ba taşniqe mi şato da 2011 uhola 2012 dnafıqwo mu athro. U thimoyano mdabarwo a buqore dcama hbişoye hola 2012 dmahzamwole mu athro uba 2014 cabırwo l’Almanya. U thimoyo trayono Eyad A. dkıtyo 43 eşne, kmıthım bu tuyobo da taşniqe hol 30 hbişoye. U farsufanoste cabırwo l’Almanya ba 2018.