Mtayıb u lumodo da tmınyo da şbile du leşono Suryoyo u di tarbitho tawdithoyto Mşihoyto bu athro du Iraq

Bu darbo du nawlo, mtayıb u lumodo da tmınyo da şbile du leşono Suryoyo udi tarbitho tawdithoyto Mşihoyto bu Iraq.

Bu lumodano dmıştawtaflele 120 falohe ba şutose mşahılfe du yulfono Suryoyo, mbayın menyono d’fuqdone dgımiqadmi li şultonutho du Iraq, bnişo dmişawşıti a şbile du leşono Suryoyo udi tarbitho Mşihoyto.

Bu slogan; Camıhdode leşan dmitayıb şbile dıkmawfıqi i mdinoyuthaydan me hatho, i mdabronutho gawonoyto du yulfono Suryoyo du Iraq mtayabla athmıl u lumodayda u 8’yo da şbile du leşono Suryoyo udi tarbitho tawdithoyto Mşihoyto, bu darbo di dafo du nawlo.U lumodano dımdawamle 3 şoce, mıştawtaflele 120 farsufe dıkfulhi ba şutose du yulfono Suryoyo d’Boğdod, d’Kerxeslox, d’Ninwe ud’Basra.

Bıthır mu mamlo dsımle u mdabrono gawonoyo du yulfono Suryoyo Cimad Jajjo dım’akadle ebe u dawro ulsoyo dıknofıl aclaye leşan du kuşoro du maşıqlo du yulfono Suryoyo, a malfone mqadamlın a buhonathe wa hzayothathe leşan du şuşoto da şbile du yulfono. Bu huthomo du lumodano, a mıştawtfone mbayanlın menyono d’fuqdone, u mşatıs sictho dilonoyto mu lumodo, leşan dımqadmo a fuqdonani li wazirutho di tarbitho bi şultonutho du Iraq.

Beyn da fuqdonani dımbayni, dmitafıt u kthowo du leşono Suryoyo du maşıqlo du sedro ştithoyo la 2022, ma buhrone du Gymnasium dmitaybi bi şatathe a şbile du leşono Suryoyo da 3 maşıqle du yulfono mescoyo, leşan dhowın mtaybe la yolufe du maşıqlo yulfonoyo da 2022.

Dmişatıs betharke du nawlo dhowe ebaste maqırhonutho dilonoyto calu tewlifo du leşono Suryoyo. Dmiqafe şroyo li bsirutho da malfone du leşono Suryoyo udi tarbitho Mşihoyto uli sniqutho dkıtlın a madraşyotho la malfone da tre şbilani.