Mtayıb Work Shop du rşomo bi mdito d’Barıtle

Bi mdito d’Barıtle bi daşto d’Ninwe, mtayıb workshop du rşomo dmıştawtaflele menyono d’clayme u claymotho ma came mşahılfe di daşto.

 U workshopano dımtayıb bu ışmo “amnorutho leşan u şlomo”, hthim bıhdo methhawyonutho dfrisi eba a rşome da mıştawtfone.

 İ Mtakasto İtaloyto d’UPP bu taro di tarmitho dsımla bu ışmo “camıhdode lu şlomo” mtayabla workshop bu salon du qentrun marduthoyo di cito d’Mor Gorgis b’Barıtle bi daşto d’Ninwe. Lu workshop dmıştawtaflele menyono d’clayme u claymotho ma came mşahılfe di daşto, mdawamle 7 yawme dıdriş aydarbo i amnorutho kiba dmaqwiyo i mardutho du şlomo beyn da came.

U workshop dımtayıb bi mdabronutho du amnoro Saman Karim, bu yawmo tminoyo bıthır mu huthomayde, mtayıb hfitutho dhadırla u kohno di cito d’Mor Gorgis da Suryoye Qatholiqoye Bahnam Lallo, u mdabrono di qastra Cali İskandar, i mathlonitho di Mtakasto Emwothoyto d’Moltizer, u mcadrono du mdabrono di tarmithathe Emil Lallo, u menyono celoyo d’camo di daşto.

Bu şuroyo di hfituthathe, sim u futoho di methhawyonutho da rşome dfrisi eba a roşme di claymutho dmıştawtafla li dawrathe. Ba mamle dsimi mawdıc di hfituthathe ksındo i claymutho, kımşawşıto i mohabtho, kmaqwıyo i mlahmonutho kenşoyto, u kbınyo u şlomo beyn da came mşahlıfe d’Ninwe.

Qaşişo Bahnam Lallo bu mamlayde, mawdacle di amnorutho kımcadro bu şuşoto da came, mawxa’ste ğalabe ulsoyo’yo dmawfqo i claymutho i mohabthayda  dilonoyith bıthır mıd cayişo şartat casqe bu maşıqlano. Bebzabno, mqadım’ste bıthır mi methhawyonutho musiqi mi gudo d’Mşaxt dıkmişaklo me amnore dıkm’athli a gawne mşahılfe du kenşo Iraqoyo wi ftih şuqo di mcadronutho dımzabın eba lbuşe u medone hrene d’snici bi ido.