MUB bu buyoneyde komır bi ruho di awyutho du cedo di qyamto gıdğılbina a casqwotho dkothın b’qamutheyna

U mawtbo umthoyo d’Bethnahrin (MUB) frısle buyono bu yawmo du cedo di qyımto d’Moran Yeşuc Mşihoo dımcayadle falqo mu cameydan ramhıl.

MUB bu buyoneyde dkımcayıd u camo Suryoyo-Othuroyo-Kaldoyo-Oromoyo komır bi ruho di awyutho du cedo di qyamto gıdğılbina a casqwotho dothın b’qamutheyna.

U mawtbo umthoyo d’bethnahrin bu buyoneyde komır U cedo da 1987 di qyamto d’Moran Yeşuc Mşiho kmıstaqbılinale bu tehdit d’corona virus dımbarbız bı britho kula. Ba milyare dı bnaynoşo leşan dmaxlısi a hayathe mu gunho rabo umu tehdit, cabiri la botaththe u fayişi jbiroye dsaymi izola ruhayye. Bu makthabzabno di noşutho hawi ğalabe kewe, kafne, qtolğense u qrobe, elo lo ha kewo qatolo holladyawma lo qadır dqoşıc i noşutho. Midıd i mawdıconutho, u sıbyono dkıtla i noşutho qadır dğolıb kul qento dhawi.

MUB bu buyoneyde komır u camo Suryoyo-Othuroyo-Kaldoyo-Oromyo’ste cayış a gunhe kulle dcayışolın i noşutho wa came dlime, elo cılmathe qadır dımdawım i ithuthayde hol adyawma u mıthnahamle me hatho u qayım cali rağlo. Ba dore mahwele darqıblo mqabıl da hayle hakome leşan di hiruthayde, u qadır dmacış i haymonuthayde wa timoyothayde.

U buyono komır u camaydan dmıdle i falsafe di mşihoyutho d’Yeşuc Mşihoye mhaydole cami hiyoyuthayde, qulnaqla bi hdoyutho ubu snodo qadır dkole mqabıl da gunhe. 12 bu yarho d’Nison ba malyune dı bnaynoşo dkıtne masre bu mashap qatholiqoyo u beytnothayye falqo olsoyo mu camaydan kmıstaqbıli u gımcaydi u cedo di qyamto ba  botaththe, ba lebawothaththe u bsabro dothe yawmotho basime.

Xıd Mawtbo Umthoyo d’Bethnahrin bu sabro dkıtlan leşan dactith hiro, kımcaydina u cedo di qyamto du camaydan dkıtyo masro bu mazhab qatholiqoyo. Me gabo hreno, ktılbina husoyo la abne du camaydan dımvayacce a hayaththe mu virus d’Corona b’athrawotho frişe dıbritho, ktılbina rişo basimo la eqaryothaththe, u hulmono la kayive. Cam gabıdathe ksaymina qroyto lkul qnumo mu camaydan bi ruho du snodo du cedo di qyamto dnofıq moro li hdoyutho umthoyto, dfolığ a mkone dkıtle uba yawme di casqutho dhowe mabuco du sabro. Xıd huthomo, bu maşıqlano du kewo di korona kımmina lkul noşo dmoyıd tedbire, dowe moro lu hulmonayde. U kıtlan haymonutho a cede dıbqamuthayna gıdımcaydinalın bı fsihutho rabtho.