MUB frısle buyono bi cohnutho d’8 Odor ukomer; cal dlıkmimıd tedbire siyasi, qonunoye u dlıkmitahwe yulfono dıkmanhır u kenşo, u trajediano u kenşoyo kımdawım hani me alfayo eşne.

BRITHO – U buyonano du Mawtbo Umthoyo d’Bethnahrin kımşare ba mele; U ağono di athto, u garanti d’kenşo demoqratiqoyo’yo, frışle duktho rwıhto calu yawmo Emwothoyo da Neşe u komır; U Yawmano d’8 Odor, b’britho kmicayıd bhaqle u b’hfitwotho mşahılfotho. Bu yawmano u makthabzabnoyo dkıtle asirutho bi noşutho, bşıkıl hfito kmınqoli a zedqe di athto lu yawmoyo. İlo kinutho, u hboso wu cnufyo dkito cali athto kmıhşıw xıd hawbo di noşutho u kmıkrıh. Elo lıkmıkle qum da mafhume du qatlo udi mıştacmronutho dcali athto. Cal dlıkmimıd tedbire siyasi, qonunoye u dlıkmitahwe yulfono dıkmanhır u kenşo, u trajediano u kenşoyo kımdawım hani me alfayo eşne.

MUB mırle; İ zihniye du hkomo du ğenso, cal dıkmınco u nomuso di awyutho du kenşo udu şuşoto di mardutho demoqratikoyto, i lhiqutho du şlomo wa esore doronoye’ste lıkowın. U frodo dkıtyo me hdo xasra, cal dıktore i athto dkıtyo falge du kenşo larwal di siyase, du momuno udi mdabronutho bşıkıl mrimono kım’athır cali standart di cyeşe. Bı britho, a hbose yaqure ulo noşoye cali athto kımdawmi. U Madenho Mescoyo xıd nubco di mwaxronutho kenşoyto, kımşakıl tırpılyotho rabe qum da şuşote. Bu İran, a neşe wu camo, mi celtho di hzayto saqıbloyto dkıtte mqabıl du rejim, kmışnoqi. A hbose du tenqiso di cyeşe u du husrono dkobın lu hulmono da neşe, kmitawdıci xıd siyase di dawle u kmitabqi.

Bu Iraq, leşan dımzawği a bnotho bcumro nacimo kmawfıqi qonune, ubu şıkılano lıkhuşwi u sebyono di athto. B’Suriya, a grube jihadist khozın u qatlo da neşe Aleviye, Dürziye u Mşihoye dkıtne moro dftakar doronoyo, xıd amro wajıb cal ruhayye. B’Turkiya, ba qatle dıkmisomi kull yawmo me celotho mşahılfotho, kmazici u kmaşlın i athto. Ban athrawotho hrene du qlimo’ste a qonune di şarica, wi morutho da tarikat di tawditho cal dıkmıtabqi, a dukotho di athto dkıbco dmafhımo ruha wi hiruthayda, maciqi. U şıkıl da mdabronwotho teolojik u dkıtne anti demoqratikoye dımşahlaflın a haye kenşoye lı hbuşyo u dısxırlın qamuthe da şuşote, klozım dmişahlıfi.

MUB mırle;U sistem dkito bu qlimaydan cal dlo mıdle asas u kenşo demoqratikoyo wi şawyutho di athto udu gawro, u tacbo wi idactho da bnaynoşo’ste lıkowın mafıryone. Mafhum dkenşo dkıtyo snido lu cnufyo, camgabe dıkmatım a timoyotho du moral, lıktore’ste mahduro dmişawşıt esore bhulmono beyn du camo. Calathe ğalabe olsoyoyo dmişahlıfo i zihniyathe, u dmıbne kenşo demoqratikoyo. İ athto du camaydan mqabıl da qedome catiqe d’xliqi bu Madenho Mescoyo, kobo ağuno di hirutho u kımhafdo a timoyothayda. An ağre makthabzabnoye wi ruho du mrodo du yawmo da Falohe da Neşe d’Britho 8 Odor, kmanhıri u darbaydan u kmaqwın u sebyonaydan du şuhlofo da zıhniyat catume du qlimaydan.