08/01/2023

MUB frisle buyono bi cohnutho da 10 işne di mşatsonutho du Mawtbo Fulhoyo Suryoyo, “kobe haylo lu camaydan”

08/01/2023

Frısle u Mawtbo Umthoyo d’Bethnahrin buyono bi cohnutho da 10 işne di mşatsonutho du Mawtbo Fulhoyo Suryoyo. Bu buyonano dfrısla i Sictho di Rişonutho d’MUB kımmo;

——— buyono Mawtbo Umthoyo d’Bethnahrin ———

U ağuno di hirutho dmabdelan bi rişonutho du Mawtbo Umthoyo d’Bethnahrin, kımdawım dmıfrıs u dyoruw beyn du camaydan dıkhoye bu athro ubi golutho. Bu asasano leşan dobina funoyo la sniqwotho du camaydan, mşakıl mınyono ğalabe d’şutose u tukose, wu camaydan u Suryoyo-Othuroyo-Kaldoyo-Oromoyo me kul xasra kmitakıs. U camaydan bu Madınho Mıscoyo dkowe nişo lkul şıkıl qento u gzome, hdo ma sniqwothayde a olsoye udkıtyo hayati, dımşakıl u haylo dıkımdafıc cali ithuthaydeyo. A sisteme anti demoqratoye dımşakli ma mdabronwotho tuhmonoye, tawdithoye, faşist u mankırone, lo hiw zedqo di cyeşe lu camaydan. Me gabo hreno cal dhawi nişo la hjome da grube jihadist dıkımmathli i zıhniye du qtolğenso, u renyo du Sutoro Yothoyo mşawşıt, u mşahlıf l’bınyono mtakso.

Camu ”Rbico Araboyo” dımşarele bu Garbiyo d’Afriqya ubu Madınho Mıscoyo, u Madınho Mıscoyo cabır b’maşıqlo du bırbozo. Bu maşıqlano, a taxtuşe zayidi, wu muzoğo du şuhlofo kenşoyo mbarbız bu qlimo kule. Bu şbilo du perspektif du ağuno dmıtre u camaydan cali rağlo mqabıl di zalzale siyasi u folhoyto dhawyo, u fusqono dmişakıl haylo folhoyo b’Suriya manhıt la haye. Bu asasano 8 bu yarho d’Konun u Haroyo di şato da 2013 i mşatsonutho du Mawtbo Folhoyo Suryoyo MFS sim iclan bi mditho d’Derik bu athro d’Suriya.

Bi mşatsonutho du Mawtbo Folhoyo Suryoyo (MFS), bnişo dmınfıq moro la haye ulu mal du camaydan mid wolitho makthabzabnoyto. U Mawtbo Folhoyo Suryoyo, leşan dmakle a hawbe lo noşoye dıksamwolın u tukoso barbıroyo dı Dacış, mıdle duktho bgawıd du ağuno dımşakıl bdarğo qlimoyo u emwothoyo. Bu Garbiyo-Madınho d’Suriya bu qrobo du sutoro dhiw mqabıl dı Dacış uda grube jihadist wa kaboşe hrene, ba casrowat gabore bu qrobo dımharabbe matın lu darğo di sohdutho.

U qrobo du darqublo d’MFS dmawdacle lı britho kula u sıbyono, u haylo wi masirutho dkıtle u camaydan bu athrayde, hawi humoso b’Khabur, b’Raqqa, b’Hol, b’Dery Ezor, b’Rişacyano ubı dkotho hrene. Bi ohnutho du yawmo şatonoyo da 10 ışne di mşatsonutho d’MFS, ktılbina kuşore celoye la mharbone kulle, wu yawmo makthabzabnoyano kımcaydinale cama eqaryotho da sohde u camu camaydan u mothonoyo, b’sabro di hirutho.

  • Nihe Mawtbo Folhoyo Suryoyo MFS
  • Nihe u Ağuno di Hirutho du Camaydan.
  • Nihe lu Darbo di Hdoyutho Umthoytaydan Dmabharre a Sohdaydan Dkıtne lo Moyuthe.

Mawtbo Umthoyo d’Bethnahrin

Sictho di Rişonutho

08-01-2023

——————