MUB frısle buyono bi cohnutho du yowmo şatonoyo du qatlo d’Simele

Şafıc şwac eşne, calu qtolğenso dsımwolın a marhıbone d’Dacış calu camaydan di daşto d’Ninve bu garbyo du Iraq. Işto bu yarho d’Ob, hawi yawmo hreno komo b’gwine du makthabzabno du camaydan, d’jbırwo awıl naqla bu makthabzabnayde dtore ma dukothayde u dhowe galwoyo bu athro, dıbnewolın an abohothayde.

Camathe’ste şawco bu yarho d’Ob, u yawmo şatonoyo du qtolcamo dsımwola i şultonutho catıqto du Iraq ban 1933 cal Simele ucala qıryawotho hrene du camaydan bu garbyo du athro’yo. Calathe u Mawtbo Umthoyo d’Bethnahrin, frısle buyono dıkorih a hayle dsımlın u qtolğenso d’Simele udi daşto d’Ninwe, dkıtne tre yawme bıthre d’hıdode.

U buyono d’MUB kımşare ba melani; Bi cohnutho du yawmo şatonoyo da 88 eşne du qtolğenso d’Simele ubu yawmo şatonoyo da 7 eşne du qtolğenso dsımle u tukoso marhıbono Dacış calu camaydan di daşto d’Ninwe, b’iqoro kmathkırina a  Sohdaydan kulle ubı qaşyutho kmancılina a qatole.

U camaydan ba maşıqle mşahılfe du makthabzabno ğalabe naqlat cayiş qtolcamo wu qtolğenso da hayle hakome wa timoyotho makthabzabnoye u marduthoye du camaydan mahrıwi, ba siyasast admonoye mid nişo dmıtre dlo athro. Ban 1933, u gayso Iraqoyo cama bnayqyomayde da caşıryotho Kurdoye, hjim cala dukotho dıkhoye u camaydan bu garbiyo du Iraq u sim qtolcamo rabo acle.

MUB bu buyoneyde  kımahke calu qtolcamo barbroyo dsim calu cameydan b’Simele u komır. Bu siqumo d’7 Ob ba mowat bnaynoşo dlayimiwo b’Simele ubı barbıroyutho qtili, calathe u qtolcamano şafıc lu makthabzabno bu ışmo u qtolcamo d’Simele. A siyasat tuhmonoye, mankırone da hayle hakome, kıtwolın nişo dlohın u sebyono umthoyo du camaydan. Calathe ba casrowat qıryawotho u fınyotho ba hçome dımdawamwolın ba yarhe mahrıwi u shifi, ban alfayo man abne du camaydan fayişi jbiroye dtorın a botathe.

A mdabrone Iraqoye wa hayle hakome dbritho lo hzelın i hiyoyutho, i ithutho wa talabe du camaydan, leşan da yuthronathe mdawamme i zıhniyathe i qatolto. MUB komır; A hayle qlimoye dkıtne more di zihniyathe mbayanne u camaydan bcelıdbobo dıklozım dmılhe, calathe bu siqumo d’6 Ob 2014 mqabıl du camaydan dıkhoye’wo bi daşto d’Ninwe, sim acle hçomo du qşoco. Ba casro alfayo mu camaydan jbiri dtorın a botathe u bıthırste dtorın mu athrathe.

Man 1980’yat hol adyawma, zıd me tre mılyune mu camaydan mgalwelın mu Iraq. MUB bu hhuthomo du buyono ksoyım qrayto la hayle Emwothoye u komır; Xıd Mawtbo Umthoyo d’Bethnahrin ktulbina mu camaydan, ma Mşihoye du Madınho Mescoyo kulle, mu ray demoqratoyo Emwothoyo, dhowın mahise mqabıl di mezaltathe dkıtyo b’qento, u dşıfci li harake.