12/05/2021

MUB frısle buyono cala gunhe dıkseymo Turkiya calu cameydan bu athro du Iraq

U Mawtbo Umthoyo d’Bethnahrin d’MUB, mawdacle du camaydan u Othuroyo Kaldoyo Suryoyo dıkhoye bu garbiyo du Iraq qariwo ma thume dı Turkiya, kmıqtıl u kımgalwın bi netiçe da hçome dıkmisomi mu gayso kaboşo dı Turkiya bi dacwa du nfoqo mqabıl di marıhbonutho.

Callathe, MUB bu buyono dıfrısle lu ray gawonoyo dıbritho tlıble m’Emwotho Mhaydotho dmahto klayto çıddi mqabıl da gunhe uda mudaxalat folhoye dıksaymolın Turkiya ba n’athrawotho du qlimo.

U Mawtbo Umthoyo d’Bethnahrin d’MUB, bu buyono dıfrısle lu ray gawonoyo dıbritho tlıble m’Emwotho Mhaydotho umu kenşo emwothoyo dmahti klayto qşitho mqabıl da gunhe uda mudaxalat folhoye dıksaymolın Turkiya ba n’athrawotho qlimoye, udmaklın a’hçome dıksyamolın calu garbiyo du Iraq dilonoyith da hçomani kmisomi b’şıkıl yawmonoyo cala qıryawotho du camaydan u Othuroyo Kaldoyo Suryoyo dıknıfli b’gawıd da fenyotho dıkmisomi ebaye a’cuqobe folhoye dı Turkiya bi dacwa du nfoqo mqabıl di marıhbonutho.

MUB bu buyonayde mawdacle dı Turkiya ba hçome barbroye dıksaymolın calu garbiyo du Iraq, kmıstacımlo kul şıkıl d’zaune yaqure baynothaye u zayno du Nato, tayisyotho u soruhe, ubi netiçe da hçomani u mede dfayış mu camaydan dhawiwo nişo lu qtolğenso du Sayfo i şato da na’1915, ucdo kmıqtıl u kımgalwın ma dukothayde.

Camgabıdathe, MUB sımle qroyto la n’athrawotho qlimoye dilonoyith la n’athrawotho şbobe dşorın a’qetre d’ruhaye b’gawıd da thume di çuğrafyaththe, dmaqwın i mardutho du diyalog, dmıctarfi ba came mşahılfe udımthabti a’zedqaththe ba nomuse esonoye, udımşawşıti i mardutho di demoqratoyutho, di kinutho kenşoyto udu şlomo bi fnitho, hatheste cal da siyasat da qrobe, da dyoşe, du cnufyo, du qatlo u di golutho lımmakşarlın bu şroyo da qetre u da krize dkito, elo mawzadlın i bceldboboyutho, i saxlutho wi tuhmonoyutho bayn da came dıkhoyın bıha athro.

Callathe, u Mawtbo Umthoyo d’Bethnahrin d’MUB bu buyonayde makadle dıkkole cama came dişe udkımdafıc a’zedqaththe dilonoyith a’zedqe du camaydan u Suryoyo Othuroyo Kaldoyo dkobe kul naqla u timo rabo dkulle da qrobe dkowın, u hathe ste cal dıkmıqtıl, kımgalwın, kmidış ukmişahılfo i demoğrafya da fenyothayde a’maktabzabnoye mi celtho da manfacat qlimoye u emwothoye umi celtho dlayto kinutho noşoyto awste myodo dı hşowo.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…