MUB frisle buyono calu zulzolo dhawi b’Turkiya u Suriya, u komer: ksaymina qroyto la came d’Bethnahrin u d’Anatolya dmahwin awyutho bu yawmo mahişonano

Frısle u Mawtbo Umthoyo d’Bethnahrin buyono calu zulzolo dhawyi bi Turkiya u Suriya. Bu buyonano dfrısla i Sictho di Rişonutho d’MUB kımmo; ksaymina qroyto la came d’Bethnahrin u d’Anatolya dmahwin awyutho bu yawmo mahişonano.

——— Buyono Mawtbo Umthoyo d’Bethnahrin ———

KSAYMİNA QROYTO LA CAME D’BETHNAHRİN U D’ANATOLYA

DMAHWIN AWYUTHO BU YAWMO MAHİŞONANO

Ba şuce qadmoye du yawmo, hawi zulzolo bu yurwo d’7,7 dkıtyo u qentrunayde i qastra d’Pazarcık bi mditho d’Maraş d’Turkiya. Bıthır mi zulzolo rabano, a zulzole hrene dathın lu hwoyo hawın celtho da came d’Bethnahrin ud’Anatolya dcayşi gunho rabo. Midıd ba alfowat bnaynoşo fayişi tahta shifotho, ğalabe mınayye ya mvayacce a hayaththee yaste mjarhi. Bi ohnuthathe, u haşo rabano, u jurho mşawtıfo dkulaynayo. Calathe a natijat du gunho rabano wa tahriwe dsımle, bu tehwiyo d’ido bido cam hdode ub’mıthcadronutho rabtho kiban maqıminalın mi holo.

U zulzolo dathi lu hwoyo adyawma, cama came hrene, u camaydan cayış husrone da rohwotho uda mulkone. Dilonoyo ba mdinotho d’Adıyaman, Antiyoxiya, Holob wi Latıqiye, a citotho wa dayre du camaydan hzelın husrone, uba casrowat farsufeste mvayacce a hayaththe. Bğalabe mdinotho dkıtne bu thumo du tayımno d’Turkiya uba mdinotho du macrabgarbiyo d’Suriya, mfothıd du zulzolano ğalabe bınyone shifi, uba casro alfowat dı bnaynoşo dnafiqi hayo mtahta shifotho fayişi dlo bote.

Xıd Mawtbo Umthoyo d’Bethnahrin ksaymina qroyto lu camaydan dıkhoye bu athro ubi golutho, la şutose noşoye ula şutose hrene, dşıfci li harake lfuth da mkonaththe mqadmi snodo maddi u macnawi, leşan dmifanın a husrone dhawın u leşan dmicalji a jurhe. Ktılbina husoyo la farsufe dımvayacce a hayaththe bu zulzolo, u kımqadmina rişo basimo la eqaryothaththe ula qariwaththe, u ktılbinaste hulmono tobo la mjarhe. Klozım dobina ido bido leşan dımcaljina a jurhaydan. Kmıtyaqnina camıhdode b’fedakariye rabtho kiban şıfcina a yawmani dkıtne casqe u marire.

Mawtbo Umthoyo d’Bethnahrin

Sictho di Rişonutho

06.02.2023

——————