MUB frısle egartho d’tahınyotho lu gabo du Huyodo Suryoyo-GHS

U Mawtbo Umthoyo d’Bethnahrin, frısle egartho d’tahınyotho lu gabo du Huyodo Suryoyo-GHS, bi cohnutho du yawmo şatonoyo da 16 eşne di mşatsonuthayde.

İ Sictho di Rişonutho d’MUB mırla; GHS mıdle duktho bu ağuno dımşarewole b’Suriya ba 2011, leşan di demoqratoyutho ula zedqe noşoye u mathele u camaydan u sebyonayde ubi irade dkıtwole dobe funoyo la şuşote du qlimo.

İ Sictho di Rişonutho d’MUB frısla egartho d’tahınyotho lu gabo du Huyodo Suryoyo u mırla; Bu sabro di hirutho udu camaydan kıdorina a şlomaydan la rişone zawgoyo, da mdabrone, ula hadome du Gabo du Huyodo Suryoyo bi cohnutho du yawmo şatonoyo di mşatsonutho da 16 ışne du gabo. Ba perspektife du ağunaydan mşatıs u GHS b’Suriya ba 2005, cal dhzewo mu zabnawo i mezalto d’Suriya udu Madınho Mıscoyo.

MUB mırle; GHS mıdle duktho bgawe du ağuno dımşarewole bi şato da 2011 ma came leşan di demoqratoyutho ula zedqe noşoye. Mmathele u camaydan u mahwele u sıbyono i irade dobe funoyo la şuşote dkowe. A taxtuşe b’Suriya dcabır lgawaye hayle qlimoye u Emwothoye, wa hçome barbıroye dsıme a grube marhıbone leşan da nişathe a cjiqe, mşahlıfi l’qrobo gawoyo. Wu medano mamtele cam ruhe gunho rabo.

MUB komır; U şwolano d’Suriya dımşahlıf l’trajedi di noşutho, kmidawım dmitahıt mnoco qum du şroyayde u folitiqoyo-bi qamayto mu rejim du Bacth ubıthır ma hayle hrene dıkurxi cala yuthronathe. Hani dıkmankıri i şrorutho, ksaymi bcelıdbobutho rabtho maqabıl du camo d’Suriya, u kıbci dmaqimi a dinamike da haye mşawtıfe. U camo d’Suriya kıtle sniqutho lu huyodo, li demoqratoyutho, la zedqe noşoye, li hirutho, lu şlomo u dmıbne u athrathe me hatho.

MUB mırle; GHS mathele u camaydan bi Mdabronutho yothoyto du garbiyo madınho d’Suriya, ubu athro kule. Kobe ağuno leşan dımşatıs i kinutho beyn da came, u dhowe u geşro d’haye hathe. Leşan du medano hule ba casrowat Sohde, mıdle duktho bu gbino du sutoro da timoyotho di noşutho udu camaydan mqabıl da hayle catume. Maşmacle a talabe di hirutho du camaydan lbritho kula.

Bu huthomo MUB mırle; U Gabo du Huyodo Suryoyo b’fedakariye rabtho, bi lbibutho dmahwiyole b’gaborutho, mahıtle i masirutoh dkıtle lu athrayde ulu camayde. U ağuno makthabzabnoyano kmahwe darbo lu camayda d’britho u ksoyım qroyto li hdoyutho umthoyto. Bu asasano kımhanena u yawmo şatonoyo da 16 ışne di mşatsonutho du Gabo du Huyodo Suryoyo, b’iqoro kmahkırina a Sohde gabore dhı fdelın a hayathe bu qrobo dhiw mqabıl du tukoso marhıbono d’Dacış, u ktulbina kaşirutho rabtho la hawronaydan kulle ulu camaydan u mothonoyo bu ağuno di hirutho.