MUB MAMLO CALU AĞONO Bİ HFİTUTHO CEDO B’WORMS

Leşan ağono qawyo u aminoyo li hiyoyutho, li hirutho ula zedqe umthoye du camaydan bu athro ubi golutho, kımaşe u Mawtbo Umthoyo d’Bethnahrin hani ba casrowat d’eşne fulhone ba haqle frişe du kenşo. B’nişo da fulhonani dımdawmi bşıkıl hfito beyn du camo’yo.

Calathe athmil bi şoctho da 17.00 hadiri mathlone me MUB bu salon di cito d’Mor Feliksinus d’Mabuğ, dkıtyo bi rişonutho d’Abuna qaşo Şamcun Kurt b’Worms d’Almanya. Bi hfituthathe du Cedo du Mawlodo dgımisomo la yaqrotho, gıdobın a hadome d’MUB mawdconutho cala fulhone dıkmaşe u Mawtbo ba falqe frişe d’Bethnahrin ubi golutho.

Bebzabno bi mawdconutho dhule u qoyumo catiqo du camaydan bu parlamento d’Turkiya Tuma Çelik bi hfituthathe, hule i hzayto dkito calu maşıqlano u hassas b’britho, u hule cali lemme du Mawtbo ucali mcadronutho dgımitahwe lu camaydan bu athro-dilonoyith lu Cıraq ula yaqrotho dhzelın husrono bu yuqdono dhawiwo b’Bağdede u dnafiwole u camaydan mınyono celoyo d’Sohde.