MUB: “U cedo da haye hathe Ha Nison-Akitu howe brikho”

BETHNAHRİN – Bu sabro di hirutho kmıstaqbılina u yawmo şatonoyo da 6772 du cedo umthonoyo du rbico udi bruktho di şato hathto Ha Nison Akitu, kımşare u buyono dfrısle u Mawtbo Umthoyo d’Bethnahrin-MUB, u kımdawım ba mele; Ha Nison kımbaşır u mathyo du rbico wu hethotho du kyono. Bu Madenho Mescoyo u b’Bethnahrin u kyono bu zabno du rbico, camgabe dıkforıs a şufronayde kule,  kobe’ste moral, reğşe basime u haylo lu barnoşo.   

U cedo d’Ha Nison dıkmathıl u mawlodo wu nuhomo, hawi’ste u nubco di mardutho udi mdinoyutho d’Bethnahrin. Cal di falsafe di ciyeşe d’Ha Nison ban alfayo eşne mbayanla u şıkıl du xloqo da medone hathe-awkith i umonutho, wu syomo da benyone wi mdabronutho bu Madenho Mescoyo. U camaydan dtcınle u dımşawşatle i mardutho di cyeşe hathto d’Ha Nison b’Bethnahrin, ba dore’ste hawile dawro rişoyo bu maktabzabno di noşutho. U cafro wa nubce da maye di jeoğrafya d’Bethnahrin cal bu zoyudo dhuwlın u haq du tacbo dmahwe, mawxa hawi thnihutho bu momuno kenşoyo. Bu şıkılano cama kroxe hathe, ftih qum du cılım udu teknoloji. U cedo d’Ha Nison 13 yawme dımcayıd b’cadcido rabo, bcayni zabno hawi platform du qyomo kenşoyo.   

MUB mırle; Akitu camgabe dkıtle jawhar umthoyo, kenşoyo u şutosoyo, leşan u ağunaydan wu camaydan’ste, ağro makthabzabnoyo’yo. İ mdinoyutho catırtathe leşan dmacışinala u dımşawşıtinala, klozım dmaqwena i hdoyutho umthoytaydan. U nfoqo du moro lu camaydan dhuwle ağuno ban alfayo d’eşne b’Bethnahrin leşan i hiyoyuthaydan wi ithuthaydan, ula Sohde da qtolğense, qtolcame b’Hakkari u Simele hdo ma wolyotho da mşalonwotho dkıtlan bi umthonoyutho’yo. Xıdu mede dmahwele ba şuşote dhawi bu qlimaydan ubi brithaydan, dlaw fayış lo hdo jeoğrafya dkıtyo mşayanto aw dlo qetre. U kriz tibeloyo camu kewo di Corona, u bu qrobo dmabdela Rusya bnişo dkubşo Ukrayna, kımdawım dyoruw. İ awyutho dıgımisomo bu maşıqlano camu camaydan dkıtyo b’casqutho b’Ukrayna aw bğer athrawotho dbritho, hdo ma qacidat di siyasaydan di hdoyutho umthoyto’yo.    

MUB komır; Bu ağuno dkobina bi rişonutho d’MUB, bnişo dnufqina moro la timoyotho, ba casrowat ma hawronaydan b’gaborutho dbıhhe i nafşathe u hawın Sohde. Mi nfıqto du ağunaydan hol adyawma, mqabıl di lo kinutho makthabzabnoyto u kenşoyto dsimi calu camaydan, mid asas u xtuto du delqublo. Camgabıdathe bkull duktho du platform mdafco i şrorutho di ithutho du camaydan dıklozım dhuwyo bu athrayde. Bu asasano u athraydan, u makthabzabnaydani i marduthaydan wu cedo d’Ha Nison, timoyotho dkımşakli i ithuthaydan wi hiyoyuthaydan’ne. Dlo syomo dfrişutho d’ışmo, mathab, qlimo kıqorina u camaydan dnofıq moro l’Ha Nison uli mdinoyutho makthabzabnayto mşawtafto dkıtle. Calathe camgabıd dıkmaczımina kulnoşo breğşe celoye u bhaymonutho du furqono dmıştawtıf la hfitwotho dgımitayıb, bi cohnuthathe’ste kımcaydina u cedo umthonoyo d’Ha Nison Akitu du camaydan u Suryoyo Othuroyo KaldoyoOromoyo.  

• Nihe u cedo umthoyo d’Ha Nison Akitu. 
• Nihe lu ağunaydan dıkmacış a timoyotho makthabzabnoye u marduthoye du camaydan. 
• A Sohde du camaydan lıkmaythi.