Murat Karayılan: U şroyo di PKK elayna, latyo haraytaydan, elo u şuroyaydan’yo

BETH NAHRIN – Murat Karayılan dkıtyo bi Sictho di Rişonutho di PKK mawdacle, di dawle Turkoyto klozım ucdo bşıkıl msarhıbo dmaqbılo qonune leşan dmıtfık u maşıqlano laf qıdam. Lfuth Karayılan u şuhlofo da qonune ucdo ğalabe ulsoyo’yo leşan dmitafıt la haye u fusqono du huthomo du ağono folhoyo. U şroyo di PKK elayna, latyo haraytaydan, elo u şuroyaydan’yo.

İ sniqutho dlu maşıqlano dkıtyo u şlomo, xarita du darbo u şroyo makthabzabnoyo, xliq bu struktur/bi hzayto dımqadamle u rişono Abdullah Öcalan u dlaw fayış xıd renyano elo mşahlıf l’sniqutho folitiqoyto. Hathe latyo belhude i mşalutho da Kurdoye elo cal kull ha dıkmıtyaqın bu şlomo, bi demoqratoyutho uba haye mşawtıfe bıgawe d’Turkiya, bnişo dnoçıh u maşıqlano towo.

U qoyumo catiqo mu gabo d’HDP bu parlamento d’Turkiya İdris Baluken’ste mahkele calu maşıqlo haroyo ucala dawsat dımhalaqla i PKK leşan u şlomo u m’akadle, d’ucdo hanaqla u dawro di şultonutho’Turkiya’yo dımhalqo dawse hreto leşan dımdawım u maşıqlo du şlomo. Me gabo hreno u waziro di baroyutho du Cıraq Fuad Hussein huwle maqırhonutho lu tbocofroso b’Boğdod u mawdacle dkıtne fsihoye lu iclan dsımle u gabo da Falohe d’Kurdistan dkıtyo hadiro dmakle u ağonayde xıd gerilla ubebzabno dmaslım’ste u zaynayde.

Bıthır mu iclan di PKK’ste, u Cıraq, u qlimo d’Kurdistan u Turkiya hawilın droşe bi sbuthathe u mın dawse, klozım ucdo dmihalıq. U waziro Cıraqoyo Hussein dmawdacle di dawsathe di PKK ğalabe msimonitho u ulsoyto’yo mawdacle’ste, d’kiba dfutho tarco li mşaynutho da thume mathkarle’ste, dkıtne hadire dhowın sanode bu kordinasyon da fulhone dgımisomi bıthır mucdo-awkith, dımcadri bu teltimo da zayne du gerilla. İ maqırhonutho ideolojik du rişono di PKK Abdullah Öcalan, fusqono stratejikoyo’yo dkıtyo masro bu şuhlofo da dynamike qlimoye u Emwothoye.