Mustafa Alkazimi mbayanle rişono hatho du gayso

Amtagılyone Iraqoye ba protestowiye dkımdawmilın, ktılbi dmitaqimi ahiğmune ma woliyothaththe udmitagle cala qatole da mtagılyone. Megabo hreno, u rişwazire du Iraq Mustafa Alkazimi mbayanle rişono hatho di mdabronutho folhoyto du gayso, bu taro da şuhlofe dkobıc dmafıtlın la haye.

Athmıl bi hiğmonutho d’Alnajaf bu tayımno du Iraq, nafıq liholo taxtuşe bayn da haylawotho di mşaynutho wa mtagılyone dıktılbi dmisım şuhlofe folitiqoye udmitagle cala qatole da mtagılyone.

Amtagılyone dımhalaxlın mu wahdo rişoyo layimi qum du qentrun di mdabronutho gawoyto d’Alnajaf, u mawqadlın u bayto du hiğmuno Luay Alyasiri, ube bzabno mjarıh menyono ma haylawotho di mşaynutho ba taxtuşe dhawın qum du bayto du hiğmuno. Ba slogane dmazcaqlın amtagılyone tlıblın dmitaqım u hiğmuno d’Alnajaf, atre mcadronayde wa mdabrone da şutose mi wolithathe.

U bihiğmonutho d’Almuthanna, mtayıb athmıl taglitho rabtho dıtlib eba dmisım şuhlofo gawoyo. Amtagılyone dlayimi qum du benyono di mdabronutho gawoyto d’Almuthanna tlıblın dmıstacfiyo mi wolithayda. Camgabıdathe, amtagılyone qtıclın u darbo rişoyo bayn di mdabronutho gawoyto di hiğmonutho d’Aldiwaniya wi fnitho dıkhoye eba u hiğmuno, laşan dmınci u konvoy du hiğmuno dşofıc mu darbo dıkmawbıl li mdabronutho. Amtagılyone tlıblınste dmıstacfe u hiğmuno mi wolithayde udmibayın mdarbe farsufo şaryo.

U bihiğmonutho d’Thiqar, amtagılyone hulın muhle d’24 şoce li mdabronutho da pwelıs, laşan dmaglın cali hiyoyutho da qatole da mtagılyone.

Megabo hreno, u rişwazire du Iraq Mustafa Alkazimi mbayanle rabhaylawotho Cabdılamir Yaralla rişono di mdabronutho folhoyto du gayso.

Yaralla dmıştawtafwole la cuqobe du huroro du Iraq mu tukoso marıhbono dı Dacış, kıtwole i wolitho d’rişono da haylawotho mşawtıfe du Iraq.